Shu oy O‘zbekistonning ayrim hududlari, xususan, Toshkentda kuchli shamollar kuzatildi. Buning oqibatida ko‘plab daraxtlar avtomobillar to‘xtash joyi va qatnov qismlariga qulab tushdi. Shu bois ko‘pchilikda sug‘urta kompaniyalari tabiiy ofat tufayli jabrlangan avtomashinalarga zararni to‘lab berishi yoki yo‘qligi haqida savollar paydo bo‘ldi, deb yozadi “Darakchi.uz”.
“Sug‘urtaning majburiy hamda ixtiyoriy turlari mavjud. Agar avtomashina ixtiyoriy sug‘urta turi bo‘yicha sug‘urtalangan bo‘lib, sug‘urta shartnomasida sug‘urta holatlari sifatida sodir bo‘lgan tabiiy ofat oqibatida yetkazilgan zararning qoplanishi belgilangan bo‘lsa, bunday holda albatta sug‘urta kompaniyasi yetkazilgan zararni to‘lab beradi”, — deb ta’kidlaydi “O‘zbekinvest” eksport-import milliy sug‘urta kompaniyasi matbuot xizmati boshlig‘i Ortiqxo‘ja Norov.
“Respublikamizda amaldagi ‘Transport vositalari egalarining fuqarolik javobgarligini majburiy sug‘urta qilish to‘g‘risida‘gi qonunga muvofiq, sug‘urtalovchining uchinchi shaxs oldidagi javobgarligi sug‘urtalangan bo‘lib, uning hayoti, sog‘lig‘i va mol-mulkiga ushbu sug‘urta hodisasi oqibatida yetkazilgan zararning o‘rnini shartnomada shartlashilgan haq, ya’ni sug‘urta mukofoti evaziga sug‘urta puli doirasida qoplash majburiyatini oladi. Bunda tabiiy ofat sug‘urta hodisasi sifatida ko‘zda tutilmagan”, — qo‘shimcha qildi u.
Izoh (0)