Google I/О конференцияси: Android N’га киритилган янгиликлар, «ақлли» ёрдамчи ва бошқа тақдимотлар

Google компанияси Android N мобил тизимининг янги версиясини расман тақдим этди, деб ёзади «Hi-tech.mail.ru». Ишлаб чиқувчилар учун Google I/О конференциясида компания тизимдаги янги хусусиятлар ҳақида гапириб берди. Шунингдек, компания ўзининг овозли ёрдамчиси, мессенжери, у учун ёрдамчи қурилма ва бошқаларни намойиш этди.

Android N

Google’нинг мобил тизими янги версиясида хавфсизлик даражаси анча оширилди. SafetyNet ҳимоя дастури пайдо бўлди, у ҳар қандай манбалардан ўрнатилаётган барча дастурларни текширади. Тизим дастурларнинг шубҳали версияларини Google Play’дагиси билан таққослаган ҳолда ўзи ўчиради.

Дастурлар энди икки марта кичикроқ ҳажмда бўлади ва 75 фоизга тезроқ ўрнатилади. Кўп вазифалилик фаолияти яхшиланди. Шунингдек, барча дастурларни битта тугма билан ёпиш мумкин.

Иккита ойна билан ишлаш ҳамда «расм ичида расм» режими пайдо бўлди. Тизим сиз анча вақтдан буён фойдаланмаётган дастурларни кўрсатади.

Google Assistant

Google ассистант iOS’даги Siri’нинг «ҳамкасби»га айланади. Ёрдамчи диалог шаклида ишлайди. Сиз асосий саволни ёрдамчига бериб, сўнг жавоб учун қўшимча шартлар ёки параметрларни аниқлаштиришингиз мумкин.

Масалан, «Кинотеатрларда нималар кетяпти?» — деб сўрашингиз мумкин, ёрдамчи эса сизга яқин кунлар учун кинотеатрлар жадвалини кўрсатади. Кейин  «Болалар учун бирор нарса борми?» — дея аниқлаштириш мумкин, шунда у сизга мультфильмларни кўрсатади, шунингдек, чипта сотиб олишни таклиф қилади.

Мулоқот чоғида фойдаланувчи турган жой ва муҳит ҳисобга олинади. Масалан, қандайдир тарихий ёдгорлик ёнида турган ҳолда «Буни ким қурган?» — деб сўрасангиз, у сизга бу ҳақда батафсил маълумот беради.

Google Home

Google’нинг янги қурилмаси «ақлли» уйни бошқариш тизими учун ишлатилади: хоналардаги чироқларни ўчириб-ёқади, аудиотизимни, телевизорни бошқаради ва ҳоказо.

Google Home фойдаланувчининг овозли буйруқлари ва сўровларига жавоб беради. У об-ҳаво ҳақида маълумот бериши, будильникни қўйиши, мусиқани ёқиши ва интернетда маълумот қидириши мумкин.

Аllо мессенжери

Хабарлар алмашиш учун янги сервис «ақлли»лиги билан ажралиб туради. Мессенжер суҳбатдошнинг оддий саволларига тезкор жавоблар вариантларини таклиф қилади. Шунингдек, дастур орқали Google Assistant виртуал ёрдамчи билан мулоқот қилиш мумкин. У маълумотлар, расмлар қидириб топиши, саволларга жавоб бериши, ресторанларда жой буюртма қилиши, чипталар сотиб олиши мумкин.

Daydream VR-платформаси

Google компанияси Android N операцион тизимида ишловчи смартфон ва планшетлар учун виртуал реалликда дастурлар ишлаб чиқиш учун ўз платформасини намойиш қилди.

Янги VR-шлем концептини кўрсатишди, у Google Cardboard’нинг такомиллаштирилган вариантидир. Шунингдек, виртуал реалликда ишлаш учун контроллер-пульт тақдим этилди.

Android Wear 2.0

Android’нинг «ақлли» соатлар учун янги версияси тақдим этилди. Энди уларнинг смартфонга боғлиқлиги камроқ бўлади. Бунинг учун Wi-Fi ёки ички SIM-карта орқали мобил интернет алоқаси керак бўлади.

Матн киритишнинг янги усуллари пайдо бўлди, булар — экран клавиатураси, қўлда ёзиш, шунингдек, «ақлли» жавоблар. Шунингдек, спорт билан шуғулланиш учун функциялар кенгайтирилди.