Android учун батарея қувватини тежайдиган беш сифатли дастур

Смартфонларнинг батареялари илгариги муқобилларидан кўра анча катта сиғимга эгадир. Аммо мобил процессорлар ҳам ривожланмоқда, шу боис ҳатто такомиллашган аккумуляторлар ҳам ўсиб бораётган юкламани аранг эпламоқда. Бу масалани қисман ҳал этишда гаджетнинг ишлаш вақтини узайтирувчи дастурлардан фойдаланса бўлади. «Лайфхакер» бунда асқатадиган беш дастур ҳақида ҳикоя қилади.

Amplify Battery Extender

Android операцион тизимининг ҳар бир тажрибали фойдаланувчиси биладики, телефон ёхуд бошқа гаджетда қандайдир вазифа бажарилмаётган пайтда ҳам фон режимида ўнлаб турли дастурлар ишлаб туриши мумкин. Amplify ушбу «сирли ҳаёт»га нигоҳ ташлаб, тартиб ўрнатишга ёрдам беради. У орқали процессор уйғониши частотаси ва муддатини бошқариш, энг кўп қувват ейдиган дастурларнинг автоматик тарзда ишга туширилишини тақиқлаш, кераксиз тизим сервисларини блоклаб қўйиш мумкин.

Дастурнинг тўғри ишлаши учун суперфойдаланувчи ҳуқуқи ҳамда Xposed Framework керак бўлади.

Battery Saver

Бу дастур Android’нинг энг машҳур бенчмарки яратувчиси бўлган AnTuTu компанияси тарафидан ишлаб чиқилган. Бошқа дастурлардан фарқли равишда, Battery Saver қувват сақлашнинг бошқачароқ йўлини таклиф этади: процессор частотасини чеклаш ҳисобига. Фойдаланувчидан гаджет «ҳаёт»ини неча дақиқага узайтиришни исташини ёзиш талаб этилади, шундан сўнг дастур процессор частотасини керакли даражагача туширади.

Greenify

Бу дастур яратувчилари гаджетда ўрнатилган бошқа дастурларни «музлатиб», энергия истеъмолини тўхтатадиган оригинал технологияни ўйлаб топди. Бунда дастурлар ишчи ҳолатда қолаверади ва ҳар доим тегишлича қўлланилиши мумкин бўлади, бу жараённи TitaniumBackup дастури ёрдамида «музлатиш»дан ажратиб туради.

Дастур ишлаши учун суперфойдаланувчи ҳуқуқи бўлиши лозим.

GSam Battery Monitor

GSam Battery Monitor ёрдамида батарея қуввати сарфи устидан мутлақ назорат ўрнатиш мумкин. Бу дастур энергия сарфловчи барча дастурлар ва функциялар ҳақида тўлиқ ахборот тақдим этади ва шу асосда чора кўришда қўл келади. Ўз-ўзича дастур қувват тежай олмайди, аммо у тўплаган маълумот бунда асқатади.

Servicely (root only)

Servicely доимий равишда процессорни уйғотиб, батарея қувватини бежизга исроф қиладиган фон дастурларини бошқариш имконини беради. Дастур фон режимида ишлайди ва ўрнатилган муддатларда ишлаб турган жараён ва сервисларни текшириб туради. Улар орасида фойдаланувчи томонидан блоклаш рўйхатига киритилганлари бўлса, дарҳол ўчиради. Жараёнларни бошқара олиши учун дастурга root тақдим этишга тўғри келади.