Тошкент марказида жойлашган Orzu супермаркети ёпилишга тайёргарлик кўрмоқда. Бу ҳақда, супермаркет маъмуриятидаги манбаларга асосланиб, «Газета.uz» хабар бермоқда.
City Center Orzu’нинг Facebook’даги саҳифасида 13 май куни маҳсулотларга 50 фоизлик чегирма эълон қилинган эди. Кейинроқ супермаркет жамғарма карта эгаларига йиғилган маблағни чегирмали маҳсулотларга алмаштиришни таклиф қилди.
«Газета.uz»га маълум қилишларича, май ойи охирида супермаркет таъмирлаш ишлари учун ёпилади. Таъмирлаш ишлари якунига етганидан сўнг, у «Korzinka.uz» супермаркетлар тармоғининг бир қисмига айланади. Мазкур янгилик юзасидан тармоқ раҳбари Зафар Ҳошимов «Дарё» интернет-нашрига изоҳ берди.
«Шаҳарнинг қоқ марказидаги гавжум ҳудудда жойлашган City Center Orzu азалдан ўзгача файзли ва эътиборга молик савдо мажмуаларидан бири ҳисобланади. Аввало, мазкур мажмуа раҳбарлари бизга таклиф билан чиққани бир хурсанд қилган бўлса, бу ерда ‘Korzinka.uz’нинг янги маркети очилиб, харидорларга хизмат кўрсата бошлаши икки карра қувонтирди», — деди «Korzinka.uz» супермаркетлар тармоғи раҳбари Зафар Ҳошимов «Дарё» интернет-нашрига.
Зафар Ҳошимовнинг сўзларига кўра, тармоқ яқин вақт ичида Тошкентнинг бошқа ҳудудларида ҳам ўзининг янги супермаркетларини очади. Буюк Ипак йўли кўчасидаги «Салом» чойхонаси ёнида янги қурилган «Салом» савдо маркази 1-қаватида ва собиқ авиазавод ҳудуди олдидаги янги савдо марказида фаолият бошлайдиган маркетлар шулар жумласидандир. Ҳар иккала савдо марказида, «Korzinka.uz»дан ташқари, Redtag оилавий кийим-кечак ва уй жиҳозлари дўконлари ҳам бўлади.
«Шу билан бирга, Ўзбекистоннинг бошқа ҳудудларида ҳам корхонамиз шуъбаларини очиш ҳаракатидамиз. Айни дамда Бухоро ва Андижон шаҳарларида ‘Korzinka.uz’ супермаркетлари учун бинолар қуриш ишлари жадаллик билан олиб борилмоқда», — дея қўшимча қилди тармоқ раҳбари Зафар Ҳошимов.
Orzu супермаркети 2013 йилнинг октябрида City Center Orzu савдо-кўнгилочар мажмуаси негизида очилган эди. «Газета.uz»нинг аниқлик киритишича, мажмуанинг овқатланиш, кўнгилочар жойлари ва дўконлари ўз фаолиятини аввалги тартибда давом эттиради.
Изоҳ (0)