Ўзбекистон Республикаси Президенти Ислом Каримов 11 май куни Ўзбекистон Миллий университети фаолиятини янада такомиллаштириш чора-тадбирлари тўғрисида қарор (pdf) имзолади, дея хабар бермоқда «Газета.uz».
Миллий университет олий таълим ривожининг жаҳон тажрибасини ҳисобга олган ҳолда юқори малакали мутахассислар тайёрлаш даражаси ва сифатини тубдан ошириш, университет илмий салоҳиятини янада мустаҳкамлаш, ўқув жараёнининг илмий-тадқиқот фаолияти билан узвий алоқасини кучайтириш, профессор-ўқитувчилар ва талабаларни фундаментал ва амалий тадқиқотлар ўтказишга кенг жалб этиш, шунингдек, бунинг учун зарур замонавий инфратузилма ва моддий-техника базасини яратиш мақсадида қайта ташкил қилинади.
Ҳужжатда ЎзМУнинг янгиланган ташкилий тузилмаси белгилаб қўйилган, унга кўра, ОТМда геология ва география, физика, биология, кимё, математика, хорижий филология, тарих, иқтисодиёт, ижтимоий фанлар ва журналистика факультети фаолият олиб боради.
Қарорда белгиланишича, Миллий университет республиканинг математика, табиий-илмий ва гуманитар йўналишлари бўйича олий маълумотли кадрлар тайёрлаш соҳасидаги таянч олий таълим муассасаси ҳисобланади.
Шунингдек, ҳужжатга мувофиқ, Фанлар академиясининг Ядро физикаси институти тугатилади ва унинг биноларига Миллий университет физика факультетининг мутахассислик кафедралари, лабораториялари, магистратура ва докторантура бўлимлари жойлаштирилади.
Изоҳ (0)