Бутунжаҳон бокс кенгаши Поветкин – Уайлдер жангини номаълум муддатга қолдирди

Бутунжаҳон бокс кенгаши (WBC) версияси бўйича оғир вазн тоифасида жаҳон чемпиони, америкалик Деонтей Уайлдер ва россиялик Александр Поветкин ўртасидаги учрашув қолдирилди. Бу ҳақда WBC президенти Маурисио Сулейман Twitter’даги саҳифасида ёзди, деб хабар бермоқда «РБК».

ESPN журналисти Ден Рафаэль Twitter’даги саҳифасида маълум қилишича, Уайлдер ва унинг жамоаси жанг олдидан ўтказилиши керак бўлган тадбирларда иштирок этиш учун Буюк Британиядан Москвага келмаган. Уайлдер Россияга 15 май, якшанба куни етиб келиши керак эди. Журналистнинг қайд этишича, боксчининг жамоаси АҚШга қайтишни режалаштирмоқда.

• Америкалик боксчи Уайлдер россиялик Поветкин билан жанг қилиш учун шартномага имзо чекди

Уайлдернинг мураббийи ва менежери Жей Дизнинг айтишича, америкалик боксчи Александр Поветкинга қарши жанг ўтказишни режалаштирмаяпти. «Поветкин билан жанг бўлиб ўтадими? Бу ҳақда бунинг ўзидан сўранг, у бизни алдади», – Жей Диз сўзларидан иқтибос келтиради «ТАСС».

• Россиялик боксчи Поветкиннинг допинг текширувида мельдоний қолдиқлари аниқланди

13 май, жума куни Александр Поветкиннинг америкалик Деонтей Уайлдерга қарши жангини ташкиллаштираётган «Мир бокса» компанияси раҳбари Андрей Рябинский россиялик спортчининг допинг-пробасидан тақиқланган мельдоний моддаси аниқлангани ҳақида маълум қилганди. Унинг сўзларига кўра, Поветкиннинг қонида мельдоний миқдори 70 нанограммни (0,07 микрограмм) ташкил қилган. Агар допинг-тест 2016 йилнинг 1 мартига қадар олинган бўлса, спортчининг қонида 1 миллилитрга 1 микрограмм мельдоний тўғри келишига ижозат берилган.

ESPN’нинг қайд этишича, Поветкиннинг 27 апрель куни топширган допинг-тести ижобий чиққан. Унинг 7, 8 ва 11 апрель кунлари топширган допинг-тести эса салбий натижа кўрсатган. Демак, Поветкин 11–27 апрель оралиғида мельдоний қабул қилган, деган хулосага келди ESPN.

Александр Поветкиннинг Деонтей Уайлдер билан 21 майга белгиланган жанги бўладими, бўлмайдими — буни WBC ҳал қилади.