Қирғизистондаги кўпчилик сиёсатчиларга ҳозиргача мамлакат танлаган йўл ёқмайди. Бу ҳақда республика президенти Алмазбек Атамбаев маълум қилди, дея хабар беради «ТАСС».
«Улар (сиёсайчилар) ҳаққоний йўл билан ҳокимиятга келолмасликлари, чунки одамлар уларга ишонмаслигини билади. Шу сабабли исталган, ҳатто зўравонлик, қон тўкиш ва қотилликлар йўли билан бўлса-да, мамлакатдаги вазиятни издан чиқаришни исташади», — дея таъкидлаган давлат раҳбари.
Қирғизистон махсус хизматлари 12 май куни мамлакатда ҳокимиятни қўлга олишга уринишда айблаб, «Халқ парламенти» ҳаракатининг уч нафар аъзосини қўлга олди. Президентнинг билдиришича, Қирғизистон аҳолисининг аксарияти бундан хабардор.
«Демократия қонун устуворлигини англатади. Агар бутун халқ Атамбаев истеъфосини истайди, деб ўйласангиз, президентга ишонч бўйича референдум ўтказиш ғоясини илгари сурсангиз бўлади. Ташаббусингизни қўллаб-қувватлашга ваъда бераман. Мабодо халқ менга қарши овоз берса, ўша заҳоти истеъфога чиқишга тайёрман. Аммо ҳали давлат раҳбари эканман, яна бир бор огоҳлантирмоқчиман: мамлакатда вазиятни беқарорлаштиришга қаратилган барча ҳаракатларга кескин чек қўйилади ва қонунга биноан шафқатсиз жазоланади», — дея маълум қилган Атамбаев.
Изоҳ (0)