Cessna 208 самолёти 12 май, пайшанба куни АҚШнинг Калифорния штати, Фресно шаҳри яқинидаги узумзорга аварияли қўнишга мажбур бўлди. Оёғи осмондан бўлиб қолган ҳаво кемаси бортидагиларнинг барчаси — учувчи ва 17 нафар парашютчи мўъжиза билан омон қолди, дея хабар беради «ТАСС».
АҚШ федерал авиация бошқармаси расмий вакили Ян Грегорга кўра, Лоди пункти шимолидаги парашют спорти маркази аэродромидан парвоз қилганидан сўнг самолёт двигателида носозликлар пайдо бўлган. Учувчи ҳавода ортга қайтишга ҳаракат қилган, бироқ аэродромдан 1,6 километр узоқликда, автотрасса атрофида қаттиқ қўнишни амалга оширишга мажбур бўлган.
Ҳодиса юз берган Вудбриж тумани ёнғинга қарши кураш лейтенанти Дэн Шмирернинг билдиришича, парашютчилар совуққонлик ва маҳоратини намойиш этган учувчига миннатдорчилик билдирган. У ҳалокатдан қочиш учун самолётни электр узатиш линиялари остидан олиб ўтган, ҳаво кемаси тўғридан-тўғри турар-жойга тўқнашишига охирги дақиқаларда чап бериб қолган.
Изоҳ (0)