Лавозимидан четлатилган Бразилия президенти Дилма Руссефф унга нисбатан импичмент юзасидан якуний қарор чиқарилгунга қадар маош олиш ва имтиёзлардан фойдаланишда давом этади. Бу ҳақда мамлакат парламенти юқори палатаси — сенат раиси Ренан Калейрус маълум қилди, дея хабар беради «ТАСС».
«Президент лавозимидан вақтинча четлатилгани ҳақида огоҳлантириш олганидан бошлаб сенат импичмент ҳақидаги сўровни батафсил кўриб чиқа бошлади. Бу вақт давомида Руссефф қўриқчилар, тиббий суғурта, авиа ва автотранспорт, маош, расмий қароргоҳдан фойдаланиш ҳуқуқини сақлаб қолади. Девонидаги маслаҳатчилар ҳам у билан ишлашда давом этади», — дея таъкидлаган сенат раиси.
12 май, пайшанба куни Бразилия сенати Руссеффга нисбатан импичмент жараёни давом эттирилиши учун овоз берди (55 киши ёқлаган, 22 киши қарши чиққан) ва бу президент давлат раҳбарлигидан вақтинча четлатилишига олиб келди. Руссефнинг ўзи буни «тўнтариш» ва «сиёсий ўйин» сифатида баҳолади.
Изоҳ (0)