Дунёнинг йирик ОАВлари космик суратлар орқали майяларнинг йўқолган шаҳрини топишга муваффақ бўлган канадалик ўсмир бола ҳақида хабар тарқатди. Йигитча расмий табрикларни қабул қилмоқда, саноқсиз интервьюлар бермоқда ва чангалзорга экспедицияга жўнаш учун маблағ йиғмоқда. Космик эксперт Виталий Егоров эса ушбу янгиликни ипидан игнасигача таҳлил қилиб чиқди ва унинг сохта эканлигини аниқлади, деб ёзади «Популярная Механика».
Аввалроқ Канаданинг Квебек провинциясида яшовчи 15 ёшли Уильям Гадури Юкатан (Марказий Америкадаги ярим орол) чангалзорларида йўқолиб кетган майялар шаҳрини қидириб топгани хабар берилган эди.
Ўқувчининг сўзларига кўра, унга қидирув ишларида Нью-Брунсвик университети мутахассислари ёрдам берган, қўшимча суратларни Канада ва Япония космик агентликлари тақдим этган.
Уильям майялар шаҳрини Юкатан харитаси устига 23 та юлдуз туркуми харитасини жойлаштириш орқали топганини айтмоқда. Юлдуз туркумларидаги 142 та юлдуздан 117 таси майялар шаҳарларига мос тушган. Битта жойда ўзгача ёрқин юлдуз Ердаги мувофиқлигини топмаган. Шунда у сунъий йўлдошдан олинган суратлардан фойдаланиб, йўқолган шаҳар аломатларини аниқлади. Унинг айтишича, 86 метрли пирамида, 30 дан ортиқ қўлда ишланган тузилмалар аниқланган. У ҳатто шаҳарнинг тахминий майдонини 80 дан 120 квадрат километргача дея баҳолаган, бу уни майялар цивилизациясида катталиги бўйича тўртинчи ўринга чиқаради.
Нашр, аввало, Уильямнинг тақдимотидан атиги битта дона слайдни чоп этган le Journal de Montreal журналининг позициясидан таажжубга тушди.
Иккинчидан, юлдуз туркумларининг Ердаги манзилгоҳларга мос тушиши қадимий майяларда бенуқсон геодезия хизмати бўлгани, у Юкатан харитасини юқори аниқликда тузиб, сўнг унда цивилизациянинг барча шаҳарлари қурилиши режалаштирилганини назарда тутади. Бу шунчаки тасодиф эканлиги эҳтимолга яқинроқдир.
Учинчидан, «шаҳар»нинг кўрсатилган харобаларини Google Maps’да топиб, уни қадимий майя шаҳарларининг ҳақиқий харобалари билан солиштирганда, қалин ўрмон қатлами орасидан инсон қўли билан яратилган ҳеч нарсани аниқлаб бўлмаслигини кўриш мумкин. Яъни 30 та тузилма у ерда бўлган тақдирда ҳам, уларни топиш амри маҳол бўлар эди.
Тўртинчидан, келтирилган суратларда, ҳақиқатан ҳам яққол антропоген тузилмаларни кўриш мумкин: ҳозирча табиат ўрмонларни тўртбурчак шаклда кесишни ўрганганича йўқ.
Айнан шу майдонни бола пирамида қолдиғи деб ўйлаган бўлиши мумкин. Le Journal de Montreal журналистлари унинг гипотезасини қўллаб-қувватлаб, 100 км масофада ҳеч қандай замонавий шаҳар йўқлигини таъкидлади. Аммо оддий қишлоқлар у ердан 15 км нарида ҳам топилади ва уларнинг барчаси худди шу каби антропоген тўртбурчаклар билан қопланган — булар дарахтлари кесилган оддий майдонлардир.
Бешинчидан, ушбу янгиликка космик съёмка бўйича мутахассислардан ташқари ҳеч ким, шу минтақа ва шу даврга ихтисослашган профессионал археологлар ҳам фикр билдирганича йўқ.
Аввалроқ хабар берилганидек, ўқувчи боланинг топилмаси рост-ёлғонлигини текшириб кўриш имкони туғилганича йўқ — майялар шаҳри Юкатан чангалзорларидаги деярли ўтиб бўлмайдиган нуқталарда жойлашган.
Изоҳ (0)