Франция полицияси ўз жонига қасд қилган ва ушбу жараённи Periscope орқали трансляция қилган 19 ёшли қиз иштирокидаги ҳодисани текширишни бошлади, деб ёзади TJournal.
Ҳодиса 10 май куни кечки бешга яқин Париждан 40 км масофада жойлашган Игли темир йўл бекатида содир бўлди. Шу пайтда 1997 йилда туғилган қиз SMS орқали яқин дўстларидан бирига ўз жонига қасд қилиш ниятини ошкор қилди.
Шундан сўнг қиз Periscope орқали трансляцияни ишга туширди ва Арпажон шаҳридаги қариялар уйида ишлашини, умидсизлик ҳолатида эканлигини маълум қилди.
Кўплаб томошабинлар қизнинг ўз ҳаётига нуқта қўйиш истаги ҳақидаги баёнотини жиддий қабул қилмади ва унга «Биз кутяпмиз», «Сени кўрганимиздан хурсандмиз» ёки «Бу қизиқ бўлади, деб ўйлайман» каби изоҳларни ёзди.
Тез орада қиз трансляцияни ўчирмасдан туриб, ўзини поезд тагига ташлади. Ҳодиса акс этган ёзув Periscope’дан ўчирилган, аммо унинг бир нечта версиялари YouTube’да сақланиб қолган.
Айни пайтда Франция полицияси воқеа юзасидан текширув олиб бормоқда. Полиция шу пайтгача, ҳатто, камера қаршисида нутқ сўзлаган қиз ҳақиқатан ўлган-ўлмаганлигини тасдиқлагани ҳам йўқ.
Изоҳ (0)