9 май, душанба куни Хитойдаги энг баланд осмонўпар бино — Шанхай минорасининг 76-қаватидан ойна пастга қулаб тушди. Бу ҳақда TJournal хабар бермоқда.
Ҳодиса бино томоша қилувчилар учун очилганидан атиги бир неча ҳафта ўтиб содир бўлди. 200 килограмм атрофидаги ойна автотураргоҳга қўйилган Tesla автомобили ёнига келиб тушди. Зарба чоғида ҳайдовчи машинадан чиқаётган бўлган. Ойна эркакнинг ёнига келиб тушгани сабабли у омон қолди, бироқ оёғига кўплаб шиша синиқлари кириб, жароҳат олгани учун касалхонага жўнатилди. Автомобиль шикастланган ёки йўқлиги маълум эмас, лекин суратларда атрофида кўплаб шиша бўлакларини кўриш мумкин.
Маҳаллий ОАВ манбаларига кўра, ҳодиса шикастланган ойна ишчилар томонидан алмаштирилаётганда рўй берган. Шанхай минораси вакилларининг билдиришича, ойна мустаҳкам бўлган, шу боис бу ҳолат қандай содир бўлгани ҳозиргача тушунарсиз бўлиб турибди. Бинодаги барча шу каби ишлар текширув якунлангунча тўхтатилди.
Маълумот учун, Шанхай минораси саккиз йил давомида қурилган ва жорий йил мартида ертўла ва пастки қаватлари очилганди. Унинг баландлиги 632 метр бўлиб, ушбу кўрсаткич бўйича фақат Дубайдаги «Бурж Халифа»дан (828 метр) ортда қолади.
Изоҳ (0)