Олий Лига. «Шўртан» биринчи ғалабасига эга чиқди, «Металлург» эса кучли тўртликка кирди

Футбол бўйича Ўзбекистон Олий Лигасисида 8-тур беллашувлари старт олиб, 7 май кунида ўтиши керак бўлган 3 та беллашувга якун ясалди.

Куннинг марказий ўйини Бухоро шаҳрида кечиб, мезбон «Бухоро» клуби унда «Металлург»ни мағлуб эта олмади — 0:0. Қўлга киритилган 1 очко Бекобод клубини 4-ўринга олиб чиққан бўлса, 6-поғодан жой олган «Бухоро» 15 очкога эга бўлиб турибди.

Бир тур аввал бўлиб ўтган Тошкент дербисида «Бунёдкор»дан йирик ҳисобда енгилган «Пахтакор», 8-турни йирик ғалаба билан тугатди. Ўз майдонида Наманганнинг «Навбаҳор» клубини қабул қилган жамоа 3:0 ҳисобида муваффақият қозонди. Бу ғалаба «пахтакорчилар»ни 5-ўринга олиб чиқди. Игорь Сергеев эса 7 та гол билан тўпурарлар пойгасида "Металлург" аъзоси Зоҳид Абдуллаевга етиб олди.

Қайд этиш керак, «Пахтакор» Осиё Чемпионлар Лигасидан жой олган ўзининг сўнгги ўйинида ҳам 3:0 ҳисобида зафар қучганди.

Ғузорнинг «Шўртан» клуби эса 8-турда биринчи ғалабасига эга чиқди. Дастлабки олти ўйиннинг барчасида имкониятни бой берган клуб, 7-турда «Нефтчи» билан дуранг ўйнаб, биринчи очкосини қўлга киритганди.

Ўзбекистон Олий Лигаси 8-тур беллашувлари 7 май, шанба

«Пахтакор» — «Навбаҳор» 3:0

«Шўртан» — «Сўғдиёна» 3:2

«Бухоро» — «Металлург» 0:0