Суриянинг Алеппо шаҳридаги жанговар ҳаракатлар оқибатида сўнгги икки ҳафта мобайнида юзлаб одамлар ҳалок бўлди ва жароҳатланди. Бу ҳақда БМТ бош котиби расмий вакили Стефан Дюжаррик маълум қилди, дея хабар беради «ТАСС».
«Ҳамкасбларимиз охирги икки ҳафта давомида Алеппо ва унинг яқинида жанговар ҳаракатларнинг кескинлашуви юзлаб одамлар қурбон бўлиши ва яраланишига олиб келгани, улардан кўпи болалар эканлигини билдирмоқда. Мактаблар, касалхоналар ва бошқа инфратузилма объектлари шикастланган. Албатта, бу гуманитар операциялар ўтказилишига тўсқинлик қилади», — дея таъкидлаган Дюжаррик.
Расмий вакил БМТ мамлакатнинг бошқа ҳудудлари, жумладан, ўтган ҳафтада кескин жанглар ва ҳаво бомбардимонлари қайта бошланган Дераа вилоятида зўравонлик авж олаётганидан ҳам хавотирда эканлигини билдирган.
Эслатиб ўтамиз, 4 май, чоршанба куни Араб давлатлари лигаси Қоҳирадаги шошилинч йиғилишда Алепподаги вазиятни муҳокама қилади.
Изоҳ (0)