Халқаро футбол федерацияси (ФИФА) расмий сайти, Италия бош вазири Маттео Ренци ҳамда бир қатор Европа футбол клублари ижтимоий тармоқлардаги саҳифалари орқали «Лестер»ни 2015/16 йилги мавсумда Англия чемпиони бўлганлиги билан табриклади, деб хабар беради «ТАСС».
Англия чемпионати 36-тур сўнгги ўйинида «Челси» ўз майдонида «Тоттенҳэм» билан жанговар дуранг (2:2) қайд этиб, «Лестер»нинг турнир якунланишига икки тур қолганида чемпион бўлишига замин яратди. «Лестер» Англия чемпионлигини қўлга киритган 24-жамоага айланди.
ФИФА расмий сайти Англия Премьер-лигаси бошланишидан аввал букмекерларнинг котировкасини ёдга солди. «Мавсум бошида англиялик букмекерлар ‘Лестер’нинг чемпионлигини 5 000 га 1 коэффициентга баҳолаган. Худди шундай эҳтимол билан биз Элвис Преслини тирик ҳолда топишимиз ёки Лох-несс маҳлуқи бор эканини исботлашимиз мумкин эди», – дейилади хабарда.Италия бош вазири Маттео Ренци «Лестер»нинг чемпионлиги Англия футболи тарихидаги энг ёрқин саҳифаларидан бири эканини таъкидлади. Шунингдек, Ренци «Лестер»нинг муваффақиятини яратган жамоа бош мураббийи ва ҳамюрти Клаудио Раньерига ўз табрикларини йўллади.«Лестер» тарихидаги биринчи чемпионлик билан «Тоттенҳэм», «Челси», «Манчестер Сити», «Боруссия» Дортмунд ва бошқа клублар табриклашга улгурди.«Лестер» устози Клаудио Раньери учун ҳам мазкур чемпионлик фаолиятидаги биринчиси бўлди. Бундан аввал 64 ёшли мутахассис Испаниянинг «Валенсия» ва «Атлетико», Италиянинг «Парма», «Ювентус», «Рома», «Интер», «Фиорентина», «Наполи» ва «Кальяри», Франциянинг «Монако» ҳамда Англиянинг «Челси» клубларида фаолият олиб борган, аммо бирортасида ҳам мамлакат чемпиони бўла олмаган.
Қайд этиш жоиз, ўтган мавсумда «Лестер» Найжел Пирсон қўли остида Англия чемпионатини 14-ўринда якунлаган эди. Клубнинг аввалги энг юқори натижаси 1928/29 йилги мавсумда қайд этилган бўлиб, жамоа Англиянинг биринчи лигасида иккинчи ўринни эгаллаган эди.
Изоҳ (0)