FIFA, Italiya bosh vaziri va bir qator Yevropa klublari “Lester”ni chempionlik bilan tabrikladi

Xalqaro futbol federatsiyasi (FIFA) rasmiy sayti, Italiya bosh vaziri Matteo Rensi hamda bir qator Yevropa futbol klublari ijtimoiy tarmoqlardagi sahifalari orqali “Lester”ni 2015/16-yilgi mavsumda Angliya chempioni bo‘lganligi bilan tabrikladi, deb xabar beradi “TASS”.

Angliya chempionati 36-tur so‘nggi o‘yinida “Chelsi” o‘z maydonida “Tottenhem” bilan jangovar durang (2:2) qayd etib, “Lester”ning turnir yakunlanishiga ikki tur qolganida chempion bo‘lishiga zamin yaratdi. “Lester” Angliya chempionligini qo‘lga kiritgan 24-jamoaga aylandi.

• So‘rovnoma: Futbol tarixidagi eng katta sensatsiya qaysi?

FIFA rasmiy sayti Angliya Premyer-ligasi boshlanishidan avval bukmekerlarning kotirovkasini yodga soldi. “Mavsum boshida angliyalik bukmekerlar ‘Lester’ning chempionligini 5 000 ga 1 koeffitsiyentga baholagan. Xuddi shunday ehtimol bilan biz Elvis Preslini tirik holda topishimiz yoki Lox-ness mahluqi bor ekanini isbotlashimiz mumkin edi”, – deyiladi xabarda.

• Rasman: “Lester” klubi o‘z tarixida birinchi bor Angliya chempionligini qo‘lga kiritdi

Italiya bosh vaziri Matteo Rensi “Lester”ning chempionligi Angliya futboli tarixidagi eng yorqin sahifalaridan biri ekanini ta’kidladi. Shuningdek, Rensi “Lester”ning muvaffaqiyatini yaratgan jamoa bosh murabbiyi va hamyurti Klaudio Ranyeriga o‘z tabriklarini yo‘lladi.

• “Lester”ning chempionligi britaniyalik bukmekerlarga 10 mln funt zarar keltiradi

“Lester” tarixidagi birinchi chempionlik bilan “Tottenhem”, “Chelsi”, “Manchester Siti”, “Borussiya” Dortmund va boshqa klublar tabriklashga ulgurdi.

“Lester” ustozi Klaudio Ranyeri uchun ham mazkur chempionlik faoliyatidagi birinchisi bo‘ldi. Bundan avval 64 yoshli mutaxassis Ispaniyaning “Valensiya” va “Atletiko”, Italiyaning “Parma”, “Yuventus”, “Roma”, “Inter”, “Fiorentina”, “Napoli” va “Kalyari”, Fransiyaning “Monako” hamda Angliyaning “Chelsi” klublarida faoliyat olib borgan, ammo birortasida ham mamlakat chempioni bo‘la olmagan.

• “Lester” Angliya chempioni bo‘lsa, Ranyeri qo‘shimcha besh million funt sterling oladi

Qayd etish joiz, o‘tgan mavsumda “Lester” Nayjel Pirson qo‘li ostida Angliya chempionatini 14-o‘rinda yakunlagan edi. Klubning avvalgi eng yuqori natijasi 1928/29-yilgi mavsumda qayd etilgan bo‘lib, jamoa Angliyaning birinchi ligasida ikkinchi o‘rinni egallagan edi.