26–30 апрель кунлари Тошкентдаги Халқаро Вестминстер Университетида анъанавий маданият ҳафталиги бўлиб ўтди. Бу ҳақда университет матбуот хизмати «Дарё»га хабар берди.
2009 йилдан буён ўтказиб келинадиган бу тадбирга ҳар йили мингдан ортиқ томошабин ташриф буюради, улар орасида санъат арбоблари, дипломатик доира вакиллари, олимлар, журналистлар ва албатта, талабалар бор.
Тадбирнинг биринчи куни Истеъдодлар шоуси бўлиб ўтди. Унда университет талабалари ўзларининг маҳорат ва санъатларини намойиш этди. Талабаларнинг иқтидорига Асал Шодиева, Арсен Длянчев ва DJ Piligrim баҳо берди.
27 апрель куни университетнинг ривожланишига ўз ўқиши ва меҳнати билан ҳиссасини қўшган фаол ўқувчилар, гуруҳ етакчиларини тақдирлаш маросими бўлиб ўтди.
Маданият ҳафталигининг учинчи кунида ТХВУнинг икки ҳамда Тошкент олий лигасининг ҚВЗ бўйича олти жамоаси иштирокида талабалар ҳаётининг энг ёрқин тарафлари ҳажвий тарзда очиб берилди.
28 апрель куни мода ишқибозлари учун Подиум шоуси ташкил этилди. Унда ТХВУнинг талаба қизлари модель сифатида иштирок этди.
Маданият ҳафталигининг охирги кунида ArtisGreat танлов-кўргазма бўлиб ўтди. Танлов-кўргазмада Буюк Британиянинг Ўзбекистондаги элчихонаси вакиллари, Ўзбекистон Бадиий академияси раиси Акмал Нур, ТАҚИ ректори Равшан Ҳакимов ҳайъат аъзолари таркибига кирди.
Бундан ташқари, шеърлар ва энг яхши ландшафт дизайни танлови ҳам ўтказилди. Ушбу кун пазандалик ярмаркаси билан якунланди.
Изоҳ (0)