Жорий йилнинг 21–30 апрель кунлари Тошкентдаги «Ўзбекистон» спорт саройида оғир атлетика бўйича ўтказилган Осиё чемпионати якунларига кўра, Ўзбекистон аёллар терма жамоаси Рио–2016 Олимпиасига йўлланма олди, деб хабар беради Ўзбекистон Миллий олимпия қўмитаси матбуот хизмати.
Ўзбекистон эркаклар терма жамоаси сўнгги икки жаҳон чемпионати якунларига кўра, Рио–2016 ўйинларининг йўлланмаларини нақд қилиб қўйгани боис, асосий эътибор аёллар терма жамоасига қаратилди.
Мазкур қитъа чемпионатида бунга қадар йўлланмаларга эга бўлган жамоалардан ташқари 1–6-ўринларни эгаллаган аёллар терма жамоалари биттадан лицензияга эга бўлишлари белгилаб қўйилганди.
Таркибида етти нафар спортчи билан Осиё чемпионатида иштирок этган Ўзбекистон аёллар терма жамоаси Рио—2016 Олимпиадаси йўлланмаларига даъвогарлик қилганлар орасида Вьетнамдан кейин 2-ўринни эгаллади. Кейинги поғоналардан жой олган Ҳиндистон, Мўғулистон, Филиппин ва Туркманистон аёллар терма жамоаларига ҳам биттадан лицензия ажратилди.
Шундай қилиб, XXXI ёзги Олимпиада ўйинларига эркаклар терма жамоаси 5 та, аёллар терма жамоаси эса 1 та йўлланмани қўлга киритди. Оғир атлетика спорт турида йўлланмалар терма жамоаларга берилгани боис, Рио–2016 ўйинларига йўл оладиган спортчилар номи Олимпиада арафасида, 20 июнга қадар Ўзбекистон оғир атлетика федерацияси томонидан эълон қилинади.
Маълумот ўрнида, 2016 йилнинг 2 май ҳолатига кўра, ўзбекистонлик спортчилар томонидан Олимпиада ўйинларига 10 та спорт туридан жами 47 та йўлланма қўлга киритилди. 47 та Олимпиада йўлланмалари бўйича 50 нафар ўзбекистонлик спортчи Рио—2016 Олимпиадасида иштирок этади. Ситора Ҳамидова (енгил атлетика) ва Раънохон Аманова (сузиш) иккитадан йўлланмага эга. Байдарка ва каноэда эшкак эшиш ҳамда Бадиий гимнастика спорт турларида ўзбекистонлик спортчилар жамоавий баҳсларда қатнашади.
Қайд этиш жоиз, 2 май ҳолатига кўра, 7—18 сентябрда ўтказиладиган XV ёзги Паралимпия ўйинларига ўзбекистонлик спортчилар томонидан 25 та йўлланма қўлга киритилган.
Изоҳ (0)