Joriy yilning 21–30-aprel kunlari Toshkentdagi “O‘zbekiston” sport saroyida og‘ir atletika bo‘yicha o‘tkazilgan Osiyo chempionati yakunlariga ko‘ra, O‘zbekiston ayollar terma jamoasi Rio–2016 Olimpiasiga yo‘llanma oldi, deb xabar beradi O‘zbekiston Milliy olimpiya qo‘mitasi matbuot xizmati.
O‘zbekiston erkaklar terma jamoasi so‘nggi ikki jahon chempionati yakunlariga ko‘ra, Rio–2016 o‘yinlarining yo‘llanmalarini naqd qilib qo‘ygani bois, asosiy e’tibor ayollar terma jamoasiga qaratildi.
Mazkur qit’a chempionatida bunga qadar yo‘llanmalarga ega bo‘lgan jamoalardan tashqari 1–6-o‘rinlarni egallagan ayollar terma jamoalari bittadan litsenziyaga ega bo‘lishlari belgilab qo‘yilgandi.
Tarkibida yetti nafar sportchi bilan Osiyo chempionatida ishtirok etgan O‘zbekiston ayollar terma jamoasi Rio—2016 Olimpiadasi yo‘llanmalariga da’vogarlik qilganlar orasida Vyetnamdan keyin 2-o‘rinni egalladi. Keyingi pog‘onalardan joy olgan Hindiston, Mo‘g‘uliston, Filippin va Turkmaniston ayollar terma jamoalariga ham bittadan litsenziya ajratildi.
Shunday qilib, XXXI yozgi Olimpiada o‘yinlariga erkaklar terma jamoasi 5 ta, ayollar terma jamoasi esa 1 ta yo‘llanmani qo‘lga kiritdi. Og‘ir atletika sport turida yo‘llanmalar terma jamoalarga berilgani bois, Rio–2016 o‘yinlariga yo‘l oladigan sportchilar nomi Olimpiada arafasida, 20-iyunga qadar O‘zbekiston og‘ir atletika federatsiyasi tomonidan e’lon qilinadi.
Ma’lumot o‘rnida, 2016-yilning 2-may holatiga ko‘ra, o‘zbekistonlik sportchilar tomonidan Olimpiada o‘yinlariga 10 ta sport turidan jami 47 ta yo‘llanma qo‘lga kiritildi. 47 ta Olimpiada yo‘llanmalari bo‘yicha 50 nafar o‘zbekistonlik sportchi Rio—2016 Olimpiadasida ishtirok etadi. Sitora Hamidova (yengil atletika) va Ra’noxon Amanova (suzish) ikkitadan yo‘llanmaga ega. Baydarka va kanoeda eshkak eshish hamda Badiiy gimnastika sport turlarida o‘zbekistonlik sportchilar jamoaviy bahslarda qatnashadi.
Qayd etish joiz, 2-may holatiga ko‘ra, 7—18-sentabrda o‘tkaziladigan XV yozgi Paralimpiya o‘yinlariga o‘zbekistonlik sportchilar tomonidan 25 ta yo‘llanma qo‘lga kiritilgan.
Izoh (0)