Қозоғистоннинг Чимкент шаҳрида ITF туркумига кирувчи, соврин жамғармаси 10 минг АҚШ долларидан иборат Shymkent Open теннис турнирининг асосий тўр баҳслари давом этмоқда. Мазкур мусобақада иштирок этаётган ўзбекистонлик теннисчилардан Сабина Шарипова ва Комола Умарова чорак финалга чиқди.
Халқаро теннис федерацияси расмий сайтининг маълум қилишича, турнирнинг биринчи ракеткаси сифатида қайд этилган Сабина Шарипова иккинчи даврада россиялик Екатерина Казионовага қарши баҳс юритди ва 6:1, 6:1 ҳисобида зафар қучди.
Саралаш баҳслари орқали асосий босқичга чиққан Комола Умарова эса иккинчи даврада грузиялик Софиа Квацабая билан куч синашди. 16 ёшли ўзбекистонлик теннисчи дастлабки сетни 6:4 ҳисобида ўз фойдасига ҳал қилди. Иккинчи сетда 1:2 ҳисобида ортда бораётган грузиялик теннисчи учрашувни давом эттира олмаслигини маълум қилди.
Қайд этиш жоиз, Сабина Шарипова илк даврада қозоғистонлик Арина Талуэнкони ортиқча қийинчиликсиз 6:1, 6:1 ҳисобида, Комола Умарова эса россиялик Полина Новиковани 4:6, 6:2, 6:4 ҳисобида мағлубиятга учратган эди.
Шунингдек, ўзбекистонлик теннисчилардан Арина Фольц ҳам мусобақанинг иккинчи даврасида иштирок этди. Аммо беларуслик Илона Кременга қарши баҳсда 19 ёшли Фольц 4:6, 0:6 ҳисобида енгилди. Илк даврада Ўзбекистон вакили россиялик Нонна Кургиняндан 6:2, 6:4 ҳисобида устун келганди.
Изоҳ (0)