Apple Inc. Москва Арбитраж судига Америка компаниясининг iPhone, iPad, Macbook, Apple Watch ва бошқа қурилмаларини сотадиган Россия интернет-дўконлари устидан иккита даъво аризаси берди, деб ёзади «РБК» суд ҳужжатларига таяниб.
7,2 миллион рубллик биринчи даъво бўйича жавобгар «Риона Плюс» МЧЖ (up-house.ru интернет-дўкони), Даниил Ховратович ва Илья Чистяков, 9 миллион рубллик иккинчи даъво бўйича эса Павел Сухачёв ҳамда у эгалик қиладиган «Компьютер» МЧЖ (cplaza.ru интернет-дўкони) ва «Айвенго» МЧЖ жавобгар бўлди.
Сухачёв ҳозирча Apple’нинг даъвосини қабул қилиб олганича йўқ, Америка компанияси у ва унинг компанияларини судга бергани ҳақида эса журналистлар орқали хабар топган. Тадбиркор даъво муаллифлик ҳуқуқлари бузилиши билан боғлиқ деб ҳисоблайди.
2015 йил кузида Сухачёв Apple манфаатларини ҳимоя қилувчи Baker & McKenzie халқаро юридик компаниясидан шикоят қабул қилган, унда cplaza.ru домен номи Apple Inc. томонидан рўйхатдан ўтказилган маҳсулот белгилари ҳуқуқини бузиши айтилган.
Изоҳ (0)