Тошкентнинг Самарқанд дарвоза кўчасидаги трамвай йўлида Chevrolet Cobalt автомобилининг қолдириб кетилиши натижасида 8-йўналиш бўйлаб ҳаракатланувчи трамвайлар ҳаракати тўхтаб қолди. Бу ҳақда Facebook’даги «Водители Ташкента» гуруҳида хабар қолдирилган.
Ҳодиса айнан қачон содир бўлганига аниқлик киритилмаган. Фотохабар муаллифининг қайд этишича, у трамвай ҳайдовчиси бўлиб ишлаган, суратдаги Cobalt сабаб ҳодиса рўй берган куни кунлик режани бажара олмаган ва шу куниёқ ишдан ҳайдалган.
Муаллифининг ёзишича, у дарҳол Йўл ҳаракати хавфсизлиги хизмати ходимларини чақирган, улар 20 дақиқада етиб келган (фотосуратда милиция машинасини кўриш мумкин), бироқ «бундан фойда чиқмаган». Cobalt эгаси эса (муаллифнинг қайд этишича, ҳайдовчи аёл киши бўлган) машинаси трамвай йўлини тўсиб қўйганидан афсусда эканини билдирган.
Эслатиб ўтамиз, аввалроқ Тошкент шаҳар ҳокими 2016 йилда трамвайлар фаолияти тугатилиши, трамвай рельслари демонтаж қилиниши ёки кўмиб ташланишини маълум қилган эди.
Йўл ҳаракати қоидаларининг 91-бандига кўра, трамвай йўлларида, шунингдек, бевосита уларга яқинроқда трамвайларга ҳаракатланишига халақит берадиган бўлса, шунингдек, 3.27 («Тўхташ тақиқланган») йўл белгиси доирасида тўхташ тақиқланган. Маъмурий жавобгарлик тўғрисидаги кодекснинг 128-6-моддасига мувофиқ, ҳайдовчиларнинг тўхташ ёки тўхтаб туриш қоидаларини бузиш энг кам иш ҳақининг уч баравари миқдорида (18 апрель ҳолатига кўра — 390 720 сўм) жарима солинишига сабаб бўлади.
Изоҳ (0)