16–17 апрель кунлари бўлиб ўтган турли мусобақаларда беш нафар ўзбекистонлик спортчи Рио–2016 Олимпиада ўйинларига йўлланма олди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Филиппин пойтахти Манила шаҳрида таэквондонинг WTF йўналиши бўйича ўтказилаган Осиё саралаш мусобақасида икки нафар Ўзбекистон вакили Рио–2016 Олимпиадасига йўлланмани қўлга киритди. Мусобақанинг олтин медалига сазовор бўлган Никита Рафалович (-80 кг) Олимпиада лицензиясини ҳам қўлга киритди. Аёллар ўртасидаги баҳсларда Нигора Турсунқулова (-67 кг) кумуш медалга ва энг асосийси XXXI ёзги Олимпиада ўйинларида қатнашиш ҳуқуқига эга бўлди.
17 апрель, якшанба куни Пекин–2008 Олимпиада ўйинларининг совриндори Антон Фокин Рио-де-Жанейро шаҳри (Бразилия)да ўтказилаётган лицензион мусобақада муваффақиятли иштирок этиб, Рио–2016 Олимпиада ўйинларининг йўлланмасига эга бўлди.
Шунингдек, ўзбекистонлик стол теннисчи Зоҳид Кенжаев Гонконгда бўлиб ўтган лицензион турнирда Рио–2016 ўйинларининг йўлланмасини қўлга киритиб, стол тенниси бўйича ўзбекистонлик эркак спортчилар орасида биринчи бўлиб Олимпиада ўйинларида иштирок этиш ҳуқуқига эга бўлди. Таъкидлаш жоизки, стол тенниси бўйича ўзбекистонлик спортчилар сўнгги бор 2004 йили Афина (Греция)да бўлиб ўтган Олимпиада ўйинларида иштирок этган эди. Ўшанда Ўзбекистон шарафини Манзура Иноятова ҳимоя қилганди.
Бундан ташқари, спорт гимнастикаси бўйича Ўзбекистон шарафини ҳимоя қилувчи Оксана Чусовитина Рио-де-Жанейро шаҳри (Бразилия)да ўтказилган Test Event–2016 лицензион мусобақадасида иштирок этиб, фаолиятидаги еттинчи Олимпиада ўйинларига йўлланмани қўлга киритди.
Шу тариқа, Рио–2016 ўйинларига ўзбекистонлик спортчилар томонидан қўлга киритилган йўлланмалар сони 65 тага етди. Шулардан 25 таси паралимпиячиларга тегишли.
Бугун, 18 апрель куни Рио-де-Жанейро шаҳрида трамполин бўйича лицензион мусобақалар бошланади. Унда ўзбекистонлик спортчилардан Екатерина Хилько ва Анна Гаспарян иштирок этадил. Агарда Екатерина Хилько Рио–2016 ўйинларига ҳам йўлланмани қўлга киритса, бу сафарги Олимпиада ўйинлари унинг фаолиятидаги бешинчиси бўлади.
Эътиборлиси, бугунги кунга келиб дунё трамполинчилари орасида фақатгина тўрт нафар спортчи тўртта Олимпиада ўйинларида қатнашиш бахтига муяссар бўлган. Агарда Екатерина бешинчи бор Олимпиада ўйинлари йўлланмасини қўлга киритса, дунё трамполинчилари орасида 4 йилликнинг энг нуфузли турнирида иштирок этиш бўйича якка пешқадамга айланади.
Изоҳ (0)