Ўзбекистон Республикаси Президентининг 8 апрелдаги қарори билан «Ўзулгуржисавдоинвест» уюшмаси «Ўзбекозиқовқатзахира» мева-сабзавот маҳсулотларини тайёрлаш ва сақлаш бўйича корхоналар уюшмасига айлантирилди. Бу ҳақда «Газета.uz» хабар берди.
Ҳужжатда таъкидланишича, уни ташкил қилишдан кўзланган мақсад мева-сабзавот маҳсулотларини тайёрлаш ва сақлаш тизимини ички истеъмол бозорини, биринчи галда, қиш-баҳор мавсумида тўйинтириш учун такомиллаштириш, сақлашнинг замонавий технологияларини жорий қилиш йўли билан маҳсулот ҳажмидаги йўқотишларни қисқартириш, шунингдек, омбор хўжалиги ва музлатиш хоналари моддий-техник базасини ривожлантиришдир.
Янги структура республиканинг барча минтақалари бўйича мева-сабзавот маҳсулотлари, картошка, узум ва полиз экинларини сотиб олиш, сақлаш ва етказиб бериш билан шуғулланадиган 47 корхонани бирлаштиради.
“Ўзбекозиқовқатзахира” фермерлик ва деҳқончилик хўжаликлари ҳамда агрофирмалардан янги маҳсулотларни сотиб олиш, уларни ички истеъмол бозорини тўйинтириш ва нархлар барқарорлигини таъминлаш мақсадида қиш-баҳор мавсуми учун сақлаш бўйича шартномалар тузади.
Уюшманинг бошқа вазифалари қаторида маҳсулотни харид қилиш ва етказиб беришда замонавий логистика тизимини жорий этиш, унинг таркибидаги корхоналарни ривожлантириш учун инвестициялар жалб қилиш, шаҳарларда сифатли маҳсулот реализацияси учун ярмарка савдоларини ўтказиш, шунингдек, узоқ минтақалар аҳолисини зарур озиқ-овқат маҳсулотлари билан узлуксиз таъминлаш кўрсатилган.
Илгарироқ Ўзбекистонда 2016 йил ҳосилидан бошлаб ҳўл мева-сабзавот маҳсулотлари, картошка, полиз экинлари ва узум харидига давлат буюртмаси жорий этилиши маълум қилинганди. Ҳўл меванинг саноат қайта ишлаб чиқариши мақсадида харид қилиниши жорий йилнинг февраль ойида ташкил этилган «Ўзбекозиқовқатхолдинг» компанияси томонидан, маҳсулотни қиш-баҳор мавсуми учун сақлаш тадбирлари «Ўзбекозиқовқатзахира» уюшмаси томонидан, экспорти эса яқинда таъсис этилган «Ўзагроэкспорт» ихтисослаштирилган ташқи савдо компанияси томонидан амалга оширилади.
Изоҳ (0)