Йирик автомобиль компаниялари қандай лимузинларни ишлаб чиқаради? (фото)

Ўтган йили янги авлод Mercedes-Maybach S-klasse автомобили Pullman версиясида пайдо бўлгани кўплаб ишлаб чиқарувчиларга ўз стрейч-лимузинларини чиқариш учун туртки берди, деб ёзади «Ведомости». Бундай машиналар фақат буюртма билан мижоз талабига кўра йиғилади, аммо бу билан автомобиль ишлаб чиқарувчининг шўъба бўлинмаси шуғулланади, бу транспорт воситаси сифатли ва чидамли бўлишини кафолатлайди.

Audi AG

Audi мижознинг махсус буюртмасига кўра, 6,36 метргача узайтирилган A8 L extended седанини тайёрлаганини маълум қилди. Компания олти эшикли седан учун бошқа буюртмаларни ҳам қабул қилганини айтди.

Daimler АG

Mercedes-Benz’ни бундай турдаги кузов бўйича буюк арбоб деб аташ мумкин, компания S-классдаги деярли барча авлодлар учун Pullman моделини чиқаради. 6,5 метрли замонавий Mercedes-Maybach Pullman стрейч-лимузини оддий ва зирҳли версияларда тақдим этилади.

Bentley Motors

Bentley олти ўриндиқли Mulsanne Grand Limousine’ни 2016 йил мартида Женевадаги автосалонда тақдим этди. Бир метрга узайтирилган версияни тайёрлаш билан компаниянинг индивидуал буюртмаларни бажаришга ихтисослашган бўлинмаси — Mulliner ателеси шуғулланади.

General Motors

Американинг General Motors компанияси 70 дюймга узайтирилган Cadillac XTS Limousine’ни ишлаб чиқаради, бу билан Cadillac Master Coachbuilders бўлинмаси шуғулланади.

FAW

Хитойликлар хорижий тажрибани фаол равишда ўзлаштиришдан тортинмайди: Hongqi Limousine FAW маркаси эгасининг шериги Ford Motor ёрдамида ва Ford Town Car базасига қурилган.

Great Wall

Деярли етти метрли Great Wall Haval Limousine стрейч-кроссовери Хитойда оммабоп 136 от кучига эга 4 цилиндрли мотор билан таъминланган. У экспортга етказиб берилади, илк лимузинлардан бири эса 2006 йилда Куба етакчиси Фидель Кастрога ҳадя этилган.

FAW Hongqi L5, L7, L9

FAW Hongqi’нинг L5, L7 ва L9 сериялари мамлакатнинг расмий ҳукумат машиналари ҳисобланади, шунингдек, эркин савдода ҳам мавжуд.