Одил Аҳмедов ўз голи билан «Краснодар»нинг «Урал» устидан эришилган йирик ғалабасига ҳисса қўшди (видео)

Россия чемпионати 23-турида «Краснодар» жамоаси ўз майдонида Екатеринбургнинг «Урал» футболчиларини қабул қилди. Мазкур учрашувда 6:0 ҳисоби қайд этилиб, мезбонларнинг йирик ғалабаси билан якунланди, деб хабар беради «Краснодар» матбуот хизмати.

Биринчи бўлимнинг 18-дақиқасида «буқалар» ҳужумчиси Фёдор Смолов ҳисобни очган бўлса, 45-дақиқада унинг ўзи ҳисобни оширди ва биринчи бўлим 2:0 ҳисобида якунланди.

Учрашувнинг 55-дақиқасида Ўзбекистон миллий терма жамоаси сардори Одил Аҳмедов чап қанотдан рақиб жарима майдончасига ёриб кирди ва тўпни дарвозабон устидан ошириб, чиройли гол муаллифига айланди – 3:0. Ўйиннинг 56 ва 61-дақиқаларида Фёдор Смолов ўз номини таблога ёздирди ҳамда фаолиятида биринчи маротаба покер қайд этди.

74-дақиқада Одил Аҳмедов ўрнига майдонга тушган Вандерсон 3 дақиқа ўтар-ўтмас «Краснодар»нинг олтинчи голига муаллифлик қилди. Бу ўйиндаги сўнгги гол бўлди.

Мазкур ғалабадан сўнг «Краснодар» жамоаси очколар сонини 40 тага етказиб, 5-ўринга кўтарилиб олди. 34 очко билан қолиб кетган «Урал» 8-поғонадан жой олди.

«Краснодар» – «Урал» (Екатеринбург) – 6:0 (2:0)

Голлар: 1:0 – 18 Смолов, 2:0 – 45 Смолов, 3:0 – 55 Одил Аҳмедов, 4:0 – 56 Смолов, 5:0 – 61 Смолов, 6:0 – 77 Вандерсон.

• Одил Аҳмедовнинг голи ва голли узатмаси «Краснодар»нинг «Динамо Москва» устидан йирик ғалабасини таъминлади (видео)