Odil Ahmedov o‘z goli bilan “Krasnodar”ning “Ural” ustidan erishilgan yirik g‘alabasiga hissa qo‘shdi (video)

Rossiya chempionati 23-turida “Krasnodar” jamoasi o‘z maydonida Yekaterinburgning “Ural” futbolchilarini qabul qildi. Mazkur uchrashuvda 6:0 hisobi qayd etilib, mezbonlarning yirik g‘alabasi bilan yakunlandi, deb xabar beradi “Krasnodar” matbuot xizmati.

Birinchi bo‘limning 18-daqiqasida “buqalar” hujumchisi Fyodor Smolov hisobni ochgan bo‘lsa, 45-daqiqada uning o‘zi hisobni oshirdi va birinchi bo‘lim 2:0 hisobida yakunlandi.

Uchrashuvning 55-daqiqasida O‘zbekiston milliy terma jamoasi sardori Odil Ahmedov chap qanotdan raqib jarima maydonchasiga yorib kirdi va to‘pni darvozabon ustidan oshirib, chiroyli gol muallifiga aylandi – 3:0. O‘yinning 56 va 61-daqiqalarida Fyodor Smolov o‘z nomini tabloga yozdirdi hamda faoliyatida birinchi marotaba poker qayd etdi.

74-daqiqada Odil Ahmedov o‘rniga maydonga tushgan Vanderson 3 daqiqa o‘tar-o‘tmas “Krasnodar”ning oltinchi goliga mualliflik qildi. Bu o‘yindagi so‘nggi gol bo‘ldi.

Mazkur g‘alabadan so‘ng “Krasnodar” jamoasi ochkolar sonini 40 taga yetkazib, 5-o‘ringa ko‘tarilib oldi. 34 ochko bilan qolib ketgan “Ural” 8-pog‘onadan joy oldi.

“Krasnodar” – “Ural” (Yekaterinburg) – 6:0 (2:0)

Gollar: 1:0 – 18 Smolov, 2:0 – 45 Smolov, 3:0 – 55 Odil Ahmedov, 4:0 – 56 Smolov, 5:0 – 61 Smolov, 6:0 – 77 Vanderson.

• Odil Ahmedovning goli va golli uzatmasi “Krasnodar”ning “Dinamo Moskva” ustidan yirik g‘alabasini ta’minladi (video)