2011 йилдан буён биринчи марта дунёдаги ҳарбий харажатларда ўсиш кузатилди, дея хабар бермоқда «РБК» Дунё муаммоларини тадқиқ қилиш бўйича Стокгольм халқаро институти (SIPRI) маърузасига таяниб. Бундай сарф-харажатлар бўйича етакчи ҳамон АҚШ бўлиб қолмоқда, Россия эса тўртинчи ўринга тушиб қолди.
Жаҳон бўйича ҳарбий харажатлар 2015 йилда қарийб 1,7 триллион долларни ташкил этди, бу ўтган йилгидан 1 фоизга кўпроқдир. Ўсиш, асосан, Осиё ва Океания, Шарқий ва Марказий Европа, шунингдек, Яқин Шарқ мамлакатлари ҳисобига содир бўлган.
Вашингтон ўз ҳарбий харажатларини 2,4 фоизга — 596 миллиард долларгача пасайтирганига қарамасдан, АҚШ ушбу кўрсаткич бўйича дунёда етакчилик қилмоқда. Иккинчи ўринни Хитой (215 млрд доллар), учинчи ўринни эса Саудия Арабистони (87,2 млрд доллар) эгаллади. Саудия Арабистони учинчи поғонадан Россияни сиқиб чиқарди, у энди 66,4 миллиард долларлик ҳарбий харажатлар билан тўртинчи ўринда жойлашди.