Ўзбекистон армияси дунёнинг энг қудратли қуролли кучлари рейтингида 54-ўриндан 48-ўринга кўтарилди. Рейтингга дунёнинг 126 давлати кирган. Бу ҳақда «Globalfirepower.com» сайтига таяниб, UzDaily маълум қилди.
Ўзбекистон МДҲ давлатлари орасида Россия (2-ўрин) ва Украинадан (30-ўрин) кейинги 3-ўринни эгаллади. Марказий Осиё давлатлари орасида эса биринчи бўлди. Қозоғистон армияси рейтингда 53-ўрин, Туркманистон 86, Қирғизистон 110 ва Тожикистон 112-ўринда жойлашди.
Рейтингни тузишда 50 га яқин турли омиллар, жумладан, қўшинлар сони, қуруқлик, ҳаво ва денгизда жанговар ҳаракатлар олиб бориш учун мўлжалланган ҳарбий техника миқдори, мамлакатлар қуролланишга сарфлаши мумкин бўлган иқтисодий манбалар ва рейтинг иштирокчиларининг географик жойлашуви ҳисобга олинди.