Фарғонада қўшни давлатдан жуда кўп миқдордаги товар қимматликларини айланма йўллар орқали олиб ўтган шахснинг қилмиши фош бўлди. Бу ҳақда Олий суд матбуот хизмати хабар берди.
Маълум қилинишича, далилий ашё сифатида олинган телефон аппаратлари давлат эгалигига ўтказилиб, бу ишга қўл урган фуқаро суд олдида жавоб берган.
Фарғона туманидаги чегара ҳудудда яшовчи Б.У. Қирғиз Республикасида яшовчи Жўмард исмли шахс билан режа тузиб, катта миқдордаги телефон аппаратларини божхона назоратини четлаган ҳолда икки давлат чегараси билан кесишган жойдан Ўзбекистонга олиб ўтмоқчи бўлган. Давлат чегараларини ажратиб турувчи ариқ орқали ҳеч қандай ҳужжатлари бўлмаган 8 турдаги 328 дона уяли телефон аппаратларини қабул қилиб олган.
Б.У. уларни уйига олиб келиб, товарларни келгусида туман марказига, яъни буюртма берганларга етказиб бериш мақсадида автомашинасининг яширинча ташиш учун тайёрланган махсус хуфиёна жойларига жойлаштирган.
ДХХ чегара қўшинларига қарашли ҳарбий қисм тезкор бўлими ходимлари томонидан ўтказилган тадбирлар давомида мазкур ҳолат аниқланиб, процессуал тартибда ҳужжатлар расмийлаштирилди. Мазкур уяли телефон аппаратларининг бозор баҳоси 2 миллиард 500 миллион 300 минг сўм эканлиги маълум бўлди.
Жиноят ишлари бўйича Фарғона тумани суди томонидан бу иш кўриб чиқилиб, судланувчига тегишли жазо тайинланди.
Изоҳ (0)