FlyDubai авиакомпаниясига тегишли «Боинг»нинг Ростов-Донда ҳалокатга учраши арафасида ҳаво кемаси учувчилари ўртасида ихтилоф келиб чиққан. Бу ҳақда «Коммерсантъ» нашрига асосланиб, Meduza хабар бермоқда.
«Қора қути»лардан олинган маълумотларга қараганда, учувчилар қўлда бошқариш режимида самолётни учинчи айлана бўйича олиб ўта бошлаган, бунда уларнинг учиш-қўниш тасмасига етишига 6 километр қолган. Бундай манёвр одатда автоматик режимда амалга оширилади, бунда борт компьютери рулларнинг туришини секин-аста ўзгартиради. Қўл бошқаруви режимида эса учувчилар буни унутиб, рулларни кескин тезлик тўплаш режимига қўйган бўлиши мумкин.
Айтилишича, учувчилар тажрибасизлиги туфайли ёки чарчоқдан самолёт кескин кўтарилаётганини пайқамаган бўлиши мумкин. Самолёт тезлиги туша бошлаганида эса улар орасида ихтилоф келиб чиққан. Улардан бири тезликни ошириб, двигателларни ердан кўтарилиш режимига мослаштирмоқчи бўлган, иккинчи учувчи эса шеригига бақира кетган.
Учувчилар самолётга бўлган босим ортаётганини тушунганида қандай ҳаракат қилиш борасида келишиб олган, лекин улар кеч қолган — самолёт қулаётган эди.
Эслатиб ўтамиз, 19 март куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради. Ҳодиса оқибатида самолёт бортида бўлган барча йўловчилар ва экипаж аъзолари ҳалок бўлган.
Изоҳ (0)