Брюсселда терактлар қурбонлари сонини аниқлашди

Бельгия ОАВлари 22 март куни аэропорт ва метрода содир бўлган терактлар қурбонлари ҳақидаги сўнгги маълумотларни ошкор этди, деб ёзади «Интерфакс». Хабарларга кўра, 28 киши ҳалок бўлган, 340 га яқин киши яраланган, уларнинг барчаси 20 та миллатга тегишли бўлган.

Аввалроқ 31 киши қурбон бўлгани ва 40 хил миллатдаги кишилар жароҳатлангани хабар берилган эди. Ҳукумат аниқлик киритишича, 31 рақами уч нафар худкуш террорчини ҳисобга олган ҳолда айтилган, уларнинг жасадлари шахси ўша вақтда аниқланмаган эди.

28 қурбондан ҳозирча 24 нафарининг шахси аниқланган, уларнинг 14 нафари «Завентем» аэропортида ва ўн нафари «Мальбек» метро бекатида ҳалок бўлган. 24 кишининг 13 нафари бельгиялик, 11 нафари саккиз миллатга тегишли хорижликдир.

26 март, шанба ҳолатига кўра, яраланганларнинг 101 нафари касалхонада ётибди.

Ҳукумат вакиллари айтишича, Брюссель терактлари қурбонлари сони якунда 35—40 кишигача кўпайиши мумкин.