Футбол бўйича Ўзбекистон ва Баҳрайн терма жамоалари Тошкентда уч бор тўқнаш келган ва мазкур учрашувларнинг барчаси жаҳон чемпионати саралаш баҳслари доирасида бўлиб ўтган. ЖЧ—2018 ва Осиё Кубоги—2019 саралаши доирасида 29 март, сешанба куни бўладиган беллашув бу борада тўртинчиси ҳисобланади.
Томонлар Тошкентда биринчи бор 2005 йилнинг 3 сентябрь куни ўзаро баҳс олиб борган. Япониялик ҳакам Тошимицу Ёшида бошқарган беллашувда Миржалол Қосимовнинг ягона голи Ўзбекистонга ғалаба келтирган.
Бироқ мазкур ўйиндаги ҳакамлик борасида ЎФФнинг эътирозидан сўнг, ФИФА учрашув натижасини бекор қилган. Шундан келиб чиқиб, Ўзбекистон терма жамоаси ўз майдонида Баҳрайнни мағлуб этмаган, дейиш ҳам мумкин.
2005 йилнинг 8 октябрь куни Тошкентда бўлиб ўтган такрорий ўйинда 1:1 ҳисоби қайд этилган. Талал Юсуф томонидан урилган голга Максим Шацких жавоб қайтарган.
Тошкент шаҳрида бўлиб ўтган учинчи ўйинда Баҳрайн 1:0 ҳисобида муваффақият қозонган. 2009 йилнинг 11 февраль кунги ўйинда Маҳмуд Абдураҳмон 90+4-дақиқада жарима зарбасини аниқ амалга ошириб, Баҳрайннинг Ўзбекистон устидан сафардаги биринчи ғалабасига сабабчи бўлган.
Эслатиб ўтамиз, Ўзбекистон — Баҳрайн учрашуви 29 март, сешанба куни Тошкент вақти билан 18:00 да «Бунёдкор» стадионида бошланади.
Изоҳ (0)