Футбол бўйича Ўзбекистон миллий терма жамоаси 29 март, сешанба куни ЖЧ—2018 ва Осиё Кубоги—2019 саралаши доирасида Тошкентда Баҳрайн терма жамоасини қабул қилади. Баҳрайн дарвозасига гол уриш бўйича ўзбекистонлик футболчилар орасида рекордчи ҳисобланган Александр Гейнрих ушбу ўйинда асосий таркибда майдонга тушиши мумкин.
«Championat.asia»нинг хабар беришича, 28 март куни ташкил этилган ўйинолди матбуот анжуманида журналистларнинг: «Гейнрихни майдонга эртароқ туширишнинг имкони борми?», — деган саволига, Ўзбекистон миллий терма жамоаси бош мураббийи Самвел Бабаян шундай жавоб қайтарди: «Саша терма жамоамизнинг муҳим бўлаги. Қозоғистонда мавсум энди бошланди. Шу боис ҳозирча уни камроқ вақтга тушираяпмиз. Агар вазият тақозо этса, Гейнрих исталган вақтда майдонга тушишга тайёр».
Маълумот учун, Ўзбекистон миллий терма жамоаси Баҳрайнга қарши ҳозирга қадар умумий ҳисобда 11 марта майдонга тушиб, унинг дарвозасига 14 та гол уриб, ўз дарвозасидан 8 та гол ўтказиб юборган.
Ўзбекистонлик тўрт футболчига Баҳрайн дарвозасига бир мартадан кўпроқ гол уриш насиб қилган — Баҳодир Сеиткамолов, Максим Шацких ва Одил Аҳмедов Баҳрайн дарвозасига иккитадан гол урган бўлса, Александр Гейнрих уч бор йўл топган.
Баҳрайнга қарши навбатдаги ўйинда бу футболчилардан Аҳмедов ва Гейнрих иштирок этади. 2015 йилнинг 8 октябрь куни ЖЧ-2018 саралаши 2-босқичининг Риффада бўлиб ўтган биринчи ўйинида, шунингдек, Игорь Сергеев, Сардор Рашидов, Элдор Шомуродов ҳам гол уришга эришган.
Эслатиб ўтамиз, Ўзбекистон миллий терма жамоаси ЖЧ—2018 ва Осиё Кубоги—2019 саралаши доирасидаги бундан аввалги учрашувни 22 март куни Филиппинга қарши ўтказиб, 1:0 ҳисобида ғалаба қозонди. Мазкур учрашувдаги ягона гол захирадан майдонга тушган Александр Гейнрихнинг тўп узатишидан сўнг Анзур Исмоилов томонидан киритилди.
Ўзбекистон ва Баҳрайн терма жамоалари ўртасидаги 29 март, сешанба куни бўладиган ўйин Тошкент вақти билан 18:00 да бошланади.
Изоҳ (0)