Филиппин устидан 1:0 ҳисобида ғолиб чиққанига қарамай, футбол бўйича Ўзбекистон миллий терма жамоаси Жаҳон чемпионати—2018 саралашининг навбатдаги босқичига йўлланма олгани йўқ. Футбол бўйича БАА чемпионатида маслаҳатчи сифатида фаолият юритаётган ўзбекистонлик мутахассис Алишер Никимбаевнинг Facebook’даги саҳифасида ёзишича, агар Таиланд Ироққа қарши саралаш ўйини сўнгги дақиқасида ўз дарвозасига гол урмаганида эди, Ўзбекистон саралашнинг учинчи босқичига йўлланмани қўлга киритиб бўлган бўларди.
Назарий жиҳатдан олиб қараганда Ўзбекистон 3-саралаш босқичида иштирок этадиган 12 та терма жамоа қаторига кира олмаслиги ҳам мумкин. Бунинг учун, Никимбаевнинг ёзишича, қуйида санаб ўтилган ҳолатларнинг барчаси рўй бериши керак:
- Ўзбекистон миллий терма жамоаси ўз майдонида Баҳрайнга имкониятни бой бериши;
- КХДР терма жамоаси сафарда Филиппин устидан зафар қучиши;
- БАА терма жамоаси ўз майдонида Саудия Арабистони термасини енгиши;
- Сурия терма жамоаси сафарда Япониядан енгилмаслиги ёки минимал ҳисобда имкониятни бой бериши;
- Иордания терма жамоаси сафарда Австралияни мағлубиятга учратиши;
- Ироқ терма жамоаси Вьетнамни мағлуб этиши.
Австралия ва Япония иштирокидаги ўйинлар Ўзбекистон — Баҳрайн беллашувидан 3—4 соат эртароқ бошланишини инобатга олсак, «Бунёдкор» стадионидаги учрашув бошлангунча Ўзбекистон терма жамоаси саралашнинг 3-босқичига чиқиб бўлиши мумкин. Мабодо беллашувга қадар ҳали ҳеч нарса аниқ бўлмаса, Баҳрайнга қарши ўйинда мағлубиятдан бошқа ҳар қандай натижа Ўзбекистон терма жамоасини 3-саралаш босқичига олиб чиқади.
Изоҳ (0)