Тошкентнинг «Пахтакор» футбол клуби бош мураббийи Нўъмон Ҳасанов жамоа ўйиндан ўйинга ўз жисмоний ҳолатини яхшилаб бораётганини айтиб ўтди. Бу ҳақда «Пахтакор» расмий сайти хабар бермоқда.
Эслатиб ўтамиз, 15 март, сешанба куни «Пахтакор» Осиё Чемпионлар Лигаси гуруҳ босқичи 3-тур учрашувлари доирасидаги Тошкентда Эроннинг «Тракторсози» жамоасини қабул қилди ва 1:0 ҳисобида ғалаба қозонди.
Ўйиндан сўнг журналистларнинг саволларига жавоб қайтарар экан, Ҳасанов учрашув давомида шогирдларини қўллаб турган мухлисларга миннатдорчилик билдирди: «Ўйин қийин кечди. Футболчилар майдонда бор кучлари билан ҳаракат қилишди. Ғалаба бизга навбатдаги босқич учун курашиш имконини беради. Ўйин давомида бизни қўллаб-қувватлаган мухлисларга раҳмат айтаман».
ОФК расмий сайти маълумотига кўра, «Пахтакор» — «Тракторсози» беллашувини томоша қилиш учун стадионга 2 223 нафар ишқибоз ташриф буюрган. Бу «C» гуруҳининг ортда қолган олти ўйинидаги энг паст кўрсаткичдир. «Пахтакор»нинг 1-тур доирасидаги «Ал-Ҳилол» билан ўйинини 3 800 нафар мухлис бевосита стадиондан кузатиб борганди.
«Тракторсози» жисмоний томондан кучли эканлигини билардик. Эронда мавсум айни қизиган пайт, биз эса энди майдонга тушишни бошладик», — деди «Пахтакор» устози. Маълумот ўрнида, «Пахтакор» Эрон клуби билан ўйинга қадар халқаро майдонда ҳам, ички чемпионатда ҳам 2 тадан ўйин ўтказган.
«Пахтакор»нинг иккинчи бўлимда нима сабабдан ҳимоявий тактика танлаганини мураббий қуйидагича изоҳлади: «Футболчиларнинг айни пайтдаги ҳолати ўйин давомида ҳужумда ўйнашга имкон бермайди. Ҳимояда рақибга деярли имкон қолдирмадик. Эрондаги ўйинда натижа учун ўйнашимиз мумкин. Лекин унгача жисмоний ҳолатимизни янада яхшилаб оламиз. Бу борада ўйиндан ўйинга ўсиб боряпмиз».
«Тракторсози» устидан қўлга киритилган ғалабадан кейин «Пахтакор» очколари сонини 4 тага етказиб, «C» гуруҳида 3-ўринга жойлашди. Жамоа ОЧЛдаги навбатдаги учрашувини 6 апрель куни Эронда «Тракторсози»га қарши ўтказади.
Изоҳ (0)