Осиё Чемпионлар Лигаси гуруҳ босқичида кетма-кет иккинчи мавсум иштирок этаётган Тошкентнинг «Локомотив» клуби халқаро майдондаги сафар учрашувларида илк бор ғалаба қозонди. Эронда «Фулад Сепаҳон» меҳмони бўлган «темирйўлчилар» 2:0 ҳисобида муваффақиятга эришди.
Учрашувнинг 14-дақиқасида Санжар Шоаҳмедовнинг тўп узатишидан сўнг Марат Бикмаев ҳисобни очди. Ўйин асосий вақти якунланишига тўрт дақиқа қолганида Сардор Мирзаев ўз номини талбога ёздириб қўйди.
Маълумот учун, Саудия Арабистонининг «Ал-Иттиҳод» жамоасига қарши сафар ўйинини инобатга олмаганда, Сардор Мирзаев мавсум бошидан буён ўтказилган қолган тўртта беллашувда гол урди.
«Локомотив» Осиё Чемпионлар Лигаси гуруҳ босқичи биринчи даврасини мағлубиятсиз якунлаган Ўзбекистоннинг ягона вакилига айланиб олди. Аввалги турларда жамоа Саудия Арабистонининг «Ал-Иттиҳод» клуби билан икки марта 1:1 ҳисобида дуранг ўйнаганди.
3-тур доирасидаги гуруҳнинг иккинчи ўйинида «Ал-Иттиҳод» БААнинг «Ан-Наср» клубини қабул қилади. Ўйин Тошкент вақти билан 22:35 да старт олади. 3-турдан кейин «Локомотив» очколари сонини 5 тага етказиб, «А» гуруҳи пешқадамига айланди.
Осиё Чемпионлар Лигаси«А» гуруҳи, 3-тур учрашуви15 март, сешанба
«Фулад Сепаҳон» (Эрон) — «Локомотив» (Ўзбекистон) 0:2 (0:1)
Голлар: Марат Бикмаев, 14 (0:1). Сардор Мирзаев, 86 (0:2).Огоҳлантириш: Сергей Прохоров, 90+3 (Л).«Фулад Сепаҳон»: 1. Раҳмон Аҳмадий, 7. Али Каримий (12. Ҳусайн Папи, 82), 9. Муҳаммад Ризо Халатборий, 10. Абдуллоҳ Карамий (6. Муҳаммадали Аҳмадий, 46), 17. Сенияд Ибричич (66. Милад Сарлак, 69), 18. Фозил Мусаев, 20. Леонардо Падовани, 29. Лусиано Перрейра, 33. Саид Ғодифар, 37. Ҳусайн Фозилий, Рошандел.
«Локомотив»: 1. Игнатий Нестеров, 5. Кахи Махарадзе (8. Сервер Жепаров, 46), 10. Марат Бикмаев (44. Сергей Прохоров, 85), 11. Темурхўжа Абдухолиқов, 15. Сардор Мирзаев, 17. Салим Мустафоев, 18. Тимур Кападзе, 20. Ислом Тўхтахўжаев, 22. Санжар Шоаҳмедов (29. Қувондиқ Рўзиев, 76), 33. Олег Зотеев, 37. Шерзод Файзиев.
Изоҳ (0)