Россиянинг асосий ҳарбий кучлари Сурия ҳудудидан чиқиб кетишига қарамай, ҳарбий маслаҳатчилар ҳамда қуролланиш бўйича мутахассислар ушбу республикада қолиб, Сурия армиясига амалий ҳарбий ва ҳарбий-техник ёрдам кўрсатишда давом этади. Бу ҳақда ҳарбий-дипломатик манбаларига асосланиб, «Интерфакс» хабар берди.
«Шубҳасиз, Россия ҳарбий гуруҳининг асосий қисми олиб чиқилганидан кейин ҳам маслаҳатчилар аппаратининг катта қисми Сурия ҳудудида ўз ишини давом эттиради», — деди агентликнинг суҳбатдоши.
Унинг сўзларига қараганда, Сурия ҳукумат қўшинларининг барча тузилмаларида россиялик ҳарбий маслаҳатчилар бор. Шу пайтга қадар Сурияда жангариларни йўқ қилиш бўйича ҳарбий вазифаларнинг 70 фоизгача бўлган қисмини РФ ҳарбий-ҳаво кучлари гуруҳи бажариб келган.
«Бугун, Россия ҳаво-космик кучлари томонидан Суриядаги операция якунланганидан сўнг, ҳарбий ҳаракатларнинг асосий оғирлиги ер усти операцияларига жалб қилинган қўшинлар зиммасига юкланади ва маслаҳатчилар аппаратининг ўрни, албатта, ошади», — деб тушунтирди номи келтирилмаган суҳбатдош.
Маслаҳатчилардан ташқари, Сурияда таъминот тузилмалари ҳарбий хизматчилари ҳамда бир қатор бошқа мутахассислар қолиши таъкидлаб ўтилди. Жами мамлакатда мингга яқин ҳарбий қолдирилади.
Бундан ташқари, журналистларнинг саволларига жавоб бераркан, Кремлнинг расмий вакили Дмитрий Песков Хмеймим ва Тартус базалари сақлаб қолинишини, улар эса персоналсиз фаолият юрита олмаслигини айтиб ўтди.
Изоҳ (0)