Жаъфар Ирисметов бошқаруви остидаги «Тошкент шаҳри имомлари» жамоаси Ўзбекистон мусулмонлари идораси тизимидаги футбол мусобақасининг финалига чиқди

Ўзбекистон мусулмонлари идораси тизимидаги футбол жамоалари ўртасидаги мусобақанинг ярим финал учрашувлари бўлиб ўтди, деб хабар беради Ўзбекистон мусулмонлари идораси матбуот хизмати.

Гуруҳ баҳсларидан муваффақиятли ўтиб, ярим финалга йўл олган «Тошкент вилояти имомлари», «Ўзбекистон мусулмонлари идораси», «Мовароуннаҳр нашриёти» ҳамда «Тошкент шаҳри имомлари» жамоалари финал йўлланмаси учун ўзаро баҳс олиб борди.

Дастлабки ярим финал учрашувида «Тошкент вилояти имомлари» жамоаси «Ўзбекистон мусулмонлари идораси» устидан 4:3 ҳисобида ғалаба қозонди.

Иккинчи ярим финал баҳсида «Мовароуннаҳр нашриёти» ҳамда «Тошкент шаҳри имомлари» жамоалари ўзаро тўқнаш келди. Яқин ўтмишнинг таниқли футболчиси, футбол бўйича Ўзбекистон миллий чемпионатининг бир мавсумида энг кўп гол киритиш бўйича рекордчиси Жаъфар Ирисметов мураббийлиги остида майдонга тушган «Тошкент шаҳри имомлари» жамоаси рақибларига ҳеч қандай имконият қолдирмаган ҳолда 7:2 ҳисобида зафар қучди ва мусобақа финалига йўл олди.

18 март, жума куни мусобақанинг финал беллашувида «Тошкент шаҳри имомлари» ва «Тошкент вилояти имомлари» жамоалари ғолиблик учун майдонга чиқади.