«Ўзавтосаноат» акциядорлик компанияси Россия ва МДҲ мамлакатларидаги ўз мавқеини сақлаб қолиш, савдо ҳажмини ошириш мақсадида бир қатор тадбирларни олиб бормоқда. Бу ҳақда компания ахборот хизмати хабар берди.
Компания матбуот хизматининг «Дарё»га маълум қилишича, 2016 йилнинг иккинчи чорагидан Т250 модели базасидаги янги Nexia (Ravon Nexia) сериялаб ишлаб чиқарилади ва экспорт қилиниши бошланади.
Matiz автомобили эса автоматик трансмиссия, хавфсизлик ёстиқчалари, ABS тормоз тизими, кундузги чироқлар, навигация тизими билан таъминланади. Бундан ташқари, двигатель ҳажми 1,25 литр бўлган, автомат узатмалар қутиси билан ҳамоҳангликда ишлайдиган М300 (Spark) моделини ишлаб чиқаришни ўзлаштириш, шунингдек, экспорт учун ишлаб чиқарилаётган барча енгил автомобилларга ЭРА-ГЛОНАСС тизимини ўрнатиш режалаштирилган.
«Россиянинг йирик шаҳарларидаги Chevrolet’нинг етакчи дилерларини GM Uzbekistan савдо тармоғига жалб этиш бўйича катта миқёсда иш олиб борилмоқда», — дейилади компания ахборотида.
GM Uzbekistan’нинг асосан Россия бозори учун мўлжалланган янги бренди — Ravon’нинг тақдимоти 2015 йил октябрида Москвада бўлиб ўтган эди. Россия нашрлари 2016 йил баҳоридан янги Nexia Россия автосалонларига етказиб берилиши ҳақида ёзганди.
2015 йилнинг декабрь ва 2016 йилнинг январь ойида Андижон ва Тошкент кўчаларида синовдан ўтказилаётган Ravon Nexia суратлари пайдо бўлди, февралда эса «Ўзавтосаноат» GM Uzbekistan’да янги автомобилни ишлаб чиқариш учун сўнгги созлаш ва монтаж ишлари олиб борилаётганини маълум қилганди.
Аввалроқ, «Ўзавтосаноат» экспорт салоҳиятини мустаҳкамлаш мақсадида Дубайда Ўзбекистонда ишлаб чиқарилган автомобиллар тақдимотини ўтказгани, Миср, Габон, Мадагаскар каби мамлакатларга синов тариқасида автомобиллар етказиб бергани ҳамда Ироқ, Ливия, Нигерия каби мамлакатларга автомобиль экспорт қилишни режалаштираётгани ҳақида хабар берилган эди.
Изоҳ (0)