Шимолий Корея ядро қуроли АҚШ ва Жанубий Корея ҳарбий машқлари муносабати билан жанговар тайёргарлик ҳолатига келтирилди. Бу ҳақда КХДР давлат мудофаа қўмитаси баёнотида маълум қилинган, дея хабар беради «Ведомости».
«Душманларимизнинг ҳамкорликдаги ҳарбий машқлари биз томонимиздан ядро урушини аланга олдиришга қаратилган очиқ-ошкор провокация ҳисобланиши сабабли бунга нисбатан жавобимиз олдини олувчи ва қақшатқич бўлади. Олий раҳбарият томонидан имзоланган Жанубий Кореяни озод қилиш ва АҚШга зарба бериш бўйича тезкор режага эгамиз. Мазкур режага биноан Жанубий Корея ҳудудидаги асосий объектлар нишонга олинган зарба воситалари жанговар тайёргарликка келтирилган, шунингдек, Америка тажовузкор кучларининг Осиё—Тинч океани минтақаси ва АҚШдаги базаларига қаратилган ядро зарбасининг қудратли воситалари доимий навбатчиликда турибди. Уларни ҳаракатга келтирсак, провокацияларнинг асосий манбалари бир зумда олов ва кулга, АҚШ ядро кучлари эса, улар қаерда бўлишидан қатъий назар, металл чиқиндисига айланади», — дейилади мазкур баёнотда.
Эслатиб ўтамиз, АҚШ ва Жанубий Корея 7 март, душанба куни 30 апрелга қадар давом этадиган Key Resolve ва Foal Eagle номли ҳарбий машғулотларни бошлади. Бу икки давлатнинг ҳарбий ҳамкорлик тарихидаги энг йирик ўқув машғулотлари бўлади.
Изоҳ (0)