Конькида югуриш спорти бўйича беш карра Жаҳон чемпиони, россиялик Павел Кулижниковдан олинган намуналарда тақиқланган препарат — мельдоний топилганини маълум бўлди. Бу ҳақда «Р-Спорт» нашрига таяниб, «Чемпионат» хабар бермоқда.
Кулижников жорий йилнинг 11–13 март кунлари Голландиянинг Херенвен шаҳрида конькида югуриш спорти бўйича Жаҳон кубоги финал босқичида иштирок этмайдиган бўлди.
Бундан аввал россиялик спортчининг организмида тақиқланган метилгексанамин моддаси аниқланган ва у 2012–2014 йиллар давомида барча турнирлардан четлаштирилганди. Антидопинг қоидаларининг такрорий бузилиши умрбод дисквалификацияга олиб келиши мумкин.
Эслатиб ўтамиз, кеча, 7 март куни россиялик теннисчи Мария Шарапова Лос-Анжелесдаги махсус матбуот анжумани чоғида 2016 йилги Австралия очиқ чемпионатида ундан олинган намуналарда ман этилган препарат — мельдоний топилганини тан олди.
Изоҳ (0)