8 март — Халқаро хотин-қизлар кунида Facebook’даги ўзбекистонлик ҳайдовчиларнинг энг катта ҳамжамиятлари — «Водители Ташкента» ҳамда «Водители Ташкента (Drivers.uz)» гуруҳлари йўл назоратчиларидан хурсанд аёл ҳайдовчиларнинг хабарлари билан тўлди.
Маълум бўлишича, байрам муносабати билан, Йўл ҳаракати хавфсизлиги хизмати ходимлари аёл ҳайдовчиларни тўхтатиб, уларни байрам билан табрикламоқда ва гуллар совға қилмоқда. Фойдаланувчиларнинг ёзишича, баъзи чорраҳаларда йўл назоратчилари фақат аёл ҳайдовчиларни тўхтатиш мақсадида турибди.
«Биринчи марта йўл назоратчисининг тўхтатиши ёқимли ҳиссиёт улашди. ‘Ойбек’ метро бекати яқинидаги чорраҳада икки йўл назоратчиси турибди, улар байрам билан табриклаш учун машиналарни тўхтатяпти. Ёқимли акция учун раҳмат», — деб ёзади байрам совғаси (гул)ни қўлга киритган аёл ҳайдовчилардан бири.
«Қандай кутилмаган ва ёқимли совға! Мен ҳужжатларни тутқазмоқчи бўлсам, йўл назоратчиси мени байрам билан табриклаб турибди», — деб ёзади хурсандчилиги билан бўлишади бошқа бир аёл. «Бугун улар ҳақиқатан ҳам ёқимли тарзда ҳайрон қолдиришяпти», — деб қўшимча қилади яна бир аёл ҳайдовчи.
Йўл назоратчиларининг бундай илиқ ва тантанавор муносабатини юқори баҳолаган баъзи аёл ҳайдовчилар ҳазил аралаш фикрлар ҳам қолдирган. Жумладан: «Қизларжон, улар ҳаммаёқда шекилли! Мен ҳар доимгидек ҳужжатларни қидиришга тушсам, улар илиқ сўзлар айтиб, гул узатиб туришибди! Афтидан, бугун Йўл ҳаракати қоидаларини бироз бузсак ҳам бўлади-ёв!».
Фикр билдирувчилардан бири йўл назоратчилари аёл ҳайдовчиларни табриклаш учун образга кириб, рол ҳам ўйнаётганини мамнуният билан қайд этган: «Бири мени қизилда ўтганликда айблаб, чалғитиб турган эди, иккинчиси кулиб, гул тақдим этди. Кичик совға-ю, лекин қандай ёқимли!».
Маълумот учун, Тошкентда Йўл ҳаракати хавфсизлиги хизмати ходимлари 2014 ва 2015 йилги 8 март байрамларида ҳам худди шундай акциялар ўтказган.
Изоҳ (0)