Москвада қизчанинг бошини кўтариб юрган аёл қўлга олинди. Бу ҳақда нима маълум?

Москвадаги Народное Ополчение кўчасидаги хонадонда 29 февраль куни ёнғин юз берди; иншоотдан қизнинг бошсиз танаси топилди. Қотилликда гумон қилинувчи — боланинг энагаси кейинроқ «Октябрское поле» метро бекати олдида қўлга олинди: аёл қизчанинг бошини кўтариб олганича, ўзини террорчи деб атаётган эди. Meduza нашри мазкур ҳодиса билан боғлиқ барча маълум тафсилотларни бир саҳифага жамлади.

Қотилликда гумонланувчи — 39 ёшли энага. У Ўзбекистонда туғилган, исми Гулчеҳра Бобоқулова. Ҳалок бўлган қизча эса тахминан тўрт ёшда бўлган. Бобоқулова бу қизга бир ярим йилча энагалик қилган, оиланинг унга нисбатан ҳеч қандай эътирози бўлмаган. 29 февраль куни тахминан соат саккизда ота-она ишга кетган, кўп ўтмай катта ўғил ўқишга йўл олган. «Московский комсомолец» нашри маълумотларига кўра, қотиллик ва хонадоннинг ёқиб юборилиши Москва вақти билан 9:40 да юз берган.

Қўлга олинган аёл ўзини портлатиб юбориш билан таҳдид қилган. Маълумотларга кўра, аёл кўчада боланинг бошини кўтариб олган ҳолда анча вақт давомида юрган ва, гувоҳларнинг видеоёзувларига асосланиладиган бўлса, ўзининг террорчи экани, ўзини портлатмоқчилиги ҳақида бақириб айтган. Аёл қора либосда бўлган, унинг юзи, фотосуратларга асосланиладиган бўлса, мато билан яширинган эди. Қўлга олишганидан сўнг, унинг танасидан портловчи ускуна топилмаган.

Сўроқ вақтида аёл ўзи амалга оширган қотилликни эрининг хиёнати билан изоҳлаган. «Интерфакс» агентлигининг ҳуқуқни муҳофаза қилиш органларидаги манбаси маълумотга кўра, жиноятга қўл урган вақтда Бобоқулова психотроп моддалар таъсири остида бўлган. Қўлга олинган аёл суд-тиббий экспертизасидан ўтказилади.

Полиция сусткашликда айбланмоқда. Гувоҳларнинг сўзларига кўра, полициячилар бу аёлни дарҳол қўлга олмаган; ҳодиса жойидан кўплаб видеолар, турли ракурслардан олинган ва ҳуқуқни муҳофаза қилиш органлари маълум вақт давомида ҳеч қандай фаол ҳаракатга киришмаганини кўриш мумкин. Роликларнинг бирида формаси полициячиникига ўхшаш киши аёлнинг ёнидан югуриб ўтаётгани, уни тўхтатишга, қўлга олишга уринмаётганини кўриш мумкин.

Россиянинг болалар ҳуқуқлари бўйича вакили Павел Астахов ҳушёр тургани учун полициячиларни мақтади. У энагаларни ёллашда руҳшунос ва наркологдан маълумотнома талаб қилишни тавсия этди.