Rossiya prezidenti matbuot kotibi Dmitriy Peskov mamlakat federal telekanallarining Moskvada enagasi tomonidan o‘ldirilgan to‘rt yoshli qiz haqida xabar bermaslik qarorini qo‘llab-quvvatlashini ma’lum qildi. Bu haqda u “RBK”ga bergan intervyusida aytib o‘tdi, deya xabar bermoqda Meduza.
Hukumat telekanallarga shov-shuvli qotillik haqida xabar qilmaslik haqida ko‘rsatma bergani haqidagi gap-so‘zlarni izohlarkan, Peskov shunday dedi: “Yo‘q, bunday emas. Kanallarning o‘zi aqldan ozganlarni ko‘rsatmadi. Lekin biz ularni qo‘llab-quvvatlaymiz”.
“RBK” ma’lumotlariga ko‘ra, Rossiya Birinchi kanali, “Rossiya-1”, “NTV” kabi federal kanallarning yangiliklar dasturida mazkur jinoyat haqida xabar berilmagan. “Ren-TV” telekanali esa faqat 12:30 dagi yangiliklar dasturida bu jinoyat haqida xabar qilgan.
“Turli federal kanallarning ikki xodimi tomonidan ‘RBK’ga berilgan ma’lumotga ko‘ra, telekanallarga bolaning o‘ldirilishi haqidagi lavhalarni bermaslik haqida tavsiya kelgan. ‘RBK’ suhbatdoshlarining tushuntirishlaridan shu narsa ayon bo‘ladiki, hukumat vakillari mazkur jinoyat sabab milliy masalaga e’tibor qaratilishidan xavotir olgan”, — deyiladi “RBK” xabarida.
29-fevral kuni Moskva shimoli-g‘arbidagi yong‘in yuz bergan xonadonda boshsiz qizning tanasi topildi. Oradan bir necha soat o‘tib “Oktyabrskoye pole” metro bekatida shu qizning enagasi, o‘zbekistonlik Gulchehra Boboqulova hibsga olingan. Xabar berishlaricha, uning qo‘lida qizchaning boshi bo‘lgan. Keyinroq, “Interfaks” xabariga ko‘ra, ayol aybiga iqror bo‘lib, ko‘rsatma bergan.
Izoh (0)