Покистоннинг барча йирик шаҳарларида Панжоб вилояти губернатори Салмон Тасирни ўлдирган Мумтоз Қадрийнинг қатл этилганига қарши оммавий норозилик намойишлари бошланди. Бу ҳақда «ТАСС» агентлиги хабар берди.
Жиноятчи бугун, 29 февраль куни Равалпинди шаҳридаги Адижала қамоқхонасида, афв этишларини бир неча бор сўрагани ҳамда қатор диний ташкилот ва партияларнинг илтимосларига қарамай, осиб ўлдирилган эди.
Қадрий қатл этилгани ҳақидаги хабар тарқалиши ҳамоноқ, унинг ўнлаб тарафдорлари Равалпиндидаги йўлларни тўсиб, мамлакатда ҳукмрон Покистон мусулмон лигасининг етакчилари тасвирланган плакатларни ёқа бошлади. Кундузи Қадрийнинг жасади олиб келинган унинг уйи атрофида эса диний ташкилотларнинг юзлаб фаоллари тўпланди.
Намойишчилар «Исломобод–Равалпинди» ва «Исломобод–Лаҳор» шосселарини ёпиб қўйгани айтилмоқда. Пешоварда бир қанча автотрассалар, Карачида эса ёқилғи қуйиш шохобчалари беркитиб қўйилди. Исломободда тезкор автобус йўналиши ҳаракати тўхтатиб қўйилди.
Тартибсизлик оқибатида жабрланганлар ҳақида ҳозирча ахборот йўқ. Қадрийнинг 1 март, сешанба куни ўтадиган дафн маросимида янада кенг миқёсли норозилик намойишлари бўлиб ўтиши кутилмоқда.
Полиция махсус бўлинмасининг собиқ жангчиси ва Салмон Тасирнинг тан соқчиси ҳисобланган Мумтоз Қадрий 2014 йилнинг 4 январида Исломобод бозорларидан бирида Панжоб губернаторини отиб ташлаган эди. Қадрий ўз ҳаракатига сабаб сифатида губернатор куфр тўғрисидаги қонунни эркинлаштиришни бир неча бор оммавий тарзда талаб қилганини кўрсатганди.
Мазкур қонунга мувофиқ, Покистон ҳудудида пайғамбар Муҳаммад (с.а.в.)ни, Қуръони Каримни ва исломнинг бошқа аҳкомларини ҳақорат қилиш жиноий жавобгарликка сабаб бўлади ва бу ҳаракатни содир этган шахс ўлим жазосига маҳкум қилинади.
Изоҳ (0)