O‘zbekiston kasaba uyushmalari Federatsiyasi Kengashi, O‘zbekiston Respublikasi Madaniyat va sport ishlari hamda Xalq ta’limi vazirliklari, O‘zbekiston Yozuvchilar va Bastakorlar uyushmalari, O‘zbekiston Milliy teleradiokompaniyasi, O‘zbekiston Milliy axborot agentligi, O‘zbekiston elektron ommaviy axborot vositalari milliy assotsiatsiyasi tomonidan bolalar qo‘shiqlari, she’rlari va hisob she’rlarni yaratish bo‘yicha respublika ijodiy tanlovi e’lon qilindi. Bu haqda Kengash matbuot xizmati ma’lum qildi.
Bastakor va shoirlar, bolalar ijodiy jamoalari, musiqa va san’at maktablari vakillari taklif etiladigan tanlov eng yaxshi yangi qo‘shiq, she’r va hisob she’ri kabi 3 yo‘nalish bo‘yicha o‘tkaziladi hamda ikki bosqichdan iborat. Hududiy bosqichda ijodiy ishlar 2016-yil 1-fevralidan 1-apreligacha Qoraqalpog‘iston Respublikasi, barcha viloyatlar va Toshkent shahar kasaba uyushmalari hududiy birlashmalarida qabul qilinadi. Nomzodlarni saralash 1-apreldan 5-aprelga qadar amalga oshiriladi. Respublika saralash bosqichi Toshkent shahrida o‘tkaziladi.
Ishtirokchilarni ro‘yxatga olish, ijodiy ishlarni qabul qilish 10-apreldan 25-aprelgacha, nomzodlarni saralash 26-apreldan 30-aprelgacha tashkil etiladi. Unda g‘oliblikni qo‘lga kiritgan, faol ishtirok etgan bastakor va shoirlar, ijodiy jamoalar 1-iyun — Xalqaro bolalarni himoya qilish kuni arafasida e’lon qilinadi hamda O‘zbekiston kasaba uyushmalari Federatsiyasi tomonidan qimmatbaho sovg‘alar bilan taqdirlanadi.
Izoh (0)