Ўзбекистондаги жисмоний шахслар 2016 йил 1 мартдан бошлаб ўз пластик карточкасидаги маблағларни бошқа бир жисмоний шахснинг исталган банк томонидан берилган пластик карточкасига бепул ўтказиши мумкин бўлади. Бу ҳақда, «Газета.uz» хабарига кўра, Марказий банкнинг Пул муомаласи департаменти директори ўринбосари Фахриддин Бобоевга асосланиб, МБ матбуот хизмати маълум қилди.
«Буни оддий қилиб айтсак, А банкнинг мижози ўз пластик карточкасидаги пулларни Б банкнинг мижози бўлган шахс пластик карточкасига исталган ҳудудда ўтказиш имконига эга бўлди. Ҳозирга қадар бу тарзда, яъни бир банкнинг мижози иккинчи бир банк мижозига пул ўтказиши техник сабабларга кўра амалга оширилмас эди», — деди Бобоев.
Мазкур ўзгаришлар Марказий банк ва Ўзбекистон банклар ассоциацияси томонидан ишлаб чиқилган ва 1 мартдан кучга кирадиган мижозларга хизмат кўрсатишда «сўм» пластик карточкалари орқали ҳисоб-китобларни амалга оширишда амал қилиши лозим бўлган тарифларнинг янги режасида кўзда тутилган.
Шунингдек, банклар томонидан жисмоний шахсларнинг пластик карточкалари ҳисобварағидаги қолдиқ маблағларга ҳисобланадиган фоизлар Марказий банкнинг қайта молиялаш ставкаси (9 фоиз)дан кам бўлмаган миқдоргача оширилди. Бунгача пластик карточкадаги қолдиқ маблағлар банклар томонидан МБ қайта молиялаш ставкасининг йиллик 1 фоизи миқдорида капиталлаштирилар эди.
Бундан ташқари, жисмоний шахслар пластик карточкаларининг (иш ҳақи, пенсия, нафақа, стипендия ва оилавий карточкалар, шу жумладан корпоратив карточкалар) фойдаланиш муддати тугаганда қайта эмиссия қилишда (алмаштиришда) банк хизмати ҳақи ундирилмаслиги тариф режасида қатъий белгилаб қўйилди.
Янги тарифлардаги бир қатор ўзгаришлар юридик шахс ва якка тартибдаги тадбиркорлар фаолиятига дахлдордир. Хусусан, улар учун корпоратив пластик карточка чиқарилганда, банк хизмати ҳақи МБ курси бўйича 20 евродан 5 еврогача пасайтирилди (илгари бу миқдор мижоз билан келишув асосида 20 еврогача этиб белгиланган эди), яроқсиз ёки йўқолган корпоратив карточкалар янгисига алмаштириб берилаётганда банк 10 еврогача (илгари 25 еврогача) хизмати ҳақи ундиради.
Изоҳ (0)