«Оскар» роботлар нигоҳида: машиналар ғолибларни қандай башорат қилади?

Компьютерлар «Оскар» ғолибларини одамлардан кўра аниқроқ тарзда башорат қилади, деб ёзади Meduza.

Фойдаланувчилар хатти-ҳаракатларини таҳлил қилиш билан шуғулланадиган Farsite компанияси кетма-кет икки йилдан буён «Оскар»нинг асосий номинациялари бўйича олти нафар ғолибнинг барчасини тўғри башорат қилмоқда.

2015 йилда ушбу Farsite моделидан фарқли равишда, Entertainment Weekly, Indiewire каби таниқли нашрлар қайси картина йилнинг бош фильмига айланишини тўғри топа олмади.

Дата-журналистикага ихтисослашган FiveThirtyEight манбасининг шу номли модели эса ўнта номинация бўйича ўз прогнозларини маълум қилган ва уларнинг фақат биттасида адашган эди.

Умуман олганда, 2015 йилда компьютерлар билан The Los Angeles Times газетасигина баҳслаша олди, у ўнтадан биттасида янглишди.

Нима учун роботлар кинотанқидчилардан ақллироқ чиқди? Танқидчилар ўз ҳиссиётларига, компьютерлар эса фақат маълумотларга таянади. Турли моделларнинг ёндашуви турлича, аммо умуман олганда, «Оскар»даги ғалаба ва номинациялар тарихи, букмекерлар қайси фильмларга пул тикиши, тавсиявий сайтлардаги рейтинглар, бошқа мукофотлар бўйича ғалабалар тарихи ҳисобга олинади.

2016 йилда эса Google News’да фильмлар номининг тилга олиниши, тақризлар таҳлили ва Twitter’га таянадиган алгоритм «Омон қолган» фильми ғолиб бўлишини башорат қилмоқда. Рейтинг ва тўпланган маблағларга асосланган алгоритм ҳисоб-китобларига кўра, «Бруклин» фильми ғалаба қозонади. FiveThirtyEight’нинг асосан бошқа мукофотлар натижаларига таянадиган алгоритми ҳам «Омон қолган» ғолиб бўлишини башорат қилмоқда.

Шунингдек, FiveThirtyEight, Farsite ва PredictWise жамоаларининг барчаси энг яхши актёр номинациясида Леонардо Ди Каприо ғолиб чиқишини прогноз қилди.