Reyting: “Istiqlol” san’at saroyidagi eng qimmat konsert dasturlari

2016-yilgi konsertlar mavsumi boshlanganiga ko‘p bo‘lgani yo‘q. Hozirgacha Gulsanam Mamazoitova, opa-singil Asalxo‘jayevalarning konsertlari o‘tib bo‘ldi, Rayhonning konserti davom etmoqda. Maygacha davom etadigan konsertlar mavsumining eng ko‘p kunlik dasturlari reytingi avvalroq e’lon qilingan edi.

Aksariyat konsertlar “Istiqlol” san’at saroyida tashkil etiladi. Jurnalist Feruz Muhammad mazkur saroyda bo‘lib, chiptalarning “Istiqlol” kassasidagi narxlari asosida eng qimmat konsertlar reytingini tayyorladi.

8—11-o‘rinlar. “Handalak” qiziqchilari; Shuhrat Qayumov; G‘ulomjon Yoqubov; “Mirzo” teatri

“Istiqlol” san’at saroyida 28—29-fevral kunlari “Handalak” guruhi qiziqchilarining, 1—2-mart kunlari O‘zbekiston xalq artisti G‘ulomjon Yoqubovning, 22—23-mart kunlari xonanda Shuhrat Qayumovning, 30-mart — 3-aprel kunlari esa “Mirzo” teatrining konsert dasturlari bo‘lib o‘tadi. Mazkur konsertlarning eng arzon chiptasi 10 ming so‘mdan boshlanadi, eng qimmati esa 70 ming so‘m.

7-o‘rin. Dildora Niyozova

Xonandaning 25—27-mart kunlari bo‘lib o‘tadigan konsert dasturlariga kirish chiptalari narxi 10 ming so‘mdan 80 ming so‘mgacha farqlanadi.

5—6-o‘rin. Zulayho Boyxonova; Ravshan Komilov

7—8-mart kunlari Zulayho Boyxonovaning, 9—10-mart kunlari esa Ravshan Komilovning yakkaxon konsert dasturi bo‘ladi. Kirish chiptalarining narxi 15 ming so‘mdan boshlanib, 100 ming so‘mgacha ko‘tariladi.

4-o‘rin. Ozodbek Nazarbekov

10—20-aprel kunlari “Istiqlol” san’at saroyida Ozodbek Nazarbekovning “Mehring sabab” nomli konsert dasturi bo‘lib o‘tadi. Kassada eng arzon chipta — 15 ming so‘m. Eng qimmati — 140 ming so‘m.

3-o‘rin. “Aziz va muqaddasan ayol”

8-mart — Xalqaro xotin-qizlar kuni munosabati bilan har yili an’anaviy tarzda tashkil etiladigan “Aziz va muqaddassan ayol” konsert dasturi bu yil 2016 yil 3—5-mart kunlari bo‘lib o‘tadi. Chiptalar 15 ming so‘mdan 150 ming so‘mgacha narxda.

2-o‘rin. Rayhon

23-fevral kuni Rayhonning yakkaxon konsert dasturi boshlandi. 27-fevralgacha davom etadigan shouning kirish chiptalari 30 ming so‘mdan 180 ming so‘mgacha narxlarda sotildi.

1-o‘rin. Shahzoda

Shahzodaning 1—7-may kunlari bo‘lib o‘tadigan konsert dasturi uchun eng arzon chipta narxi 15 ming so‘m, eng qimmati esa 200 ming so‘m. Bu qolgan konsert dasturlari orasida ham eng qimmat narxdir.